Short Videos | രാജ്യത്ത് ജനപ്രിയം ഹ്രസ്വ വീഡിയോകൾ; പ്ലാറ്റ്‌ഫോമുകളിൽ ഇന്ത്യൻ ഉപയോക്താക്കളുടെ എണ്ണം 25 കോടിയായി; 64 ശതമാനവും 25 വയസ് വരെ പ്രായമുള്ളവർ; പഠനത്തിലെ കണ്ടെത്തലുകൾ ഇങ്ങനെ

ന്യൂഡെൽഹി: (KVARTHA) ഹ്രസ്വ വീഡിയോ പ്ലാറ്റ്‌ഫോമുകളിൽ (Short Form Videos - SFV) ഇന്ത്യൻ ഉപയോക്താക്കളുടെ എണ്ണം 25 കോടിയായി, അതിൽ 70 ശതമാനവും ടയർ-2 നഗരങ്ങളിൽ നിന്നും മറ്റ് അർധ-നഗര-ഗ്രാമീണ കേന്ദ്രങ്ങളിൽ നിന്നുമാണ്. മിക്കവരും ഇടത്തരം, ഉയർന്ന വരുമാന പശ്ചാത്തലങ്ങളിൽ നിന്നുള്ളവരാണ്. ഹ്രസ്വ വീഡിയോ പ്ലാറ്റ്‌ഫോമുകളിൽ ഏകദേശം 64 ശതമാനവും 25 വയസ് വരെ പ്രായമുള്ളവരാണ്. മാർക്കറ്റ് റിസർച്ച് സ്ഥാപനമായ റെഡ്സീറിന്റെ റിപ്പോർട്ട് അനുസരിച്ച്, രാജ്യത്ത് മൂന്ന് ശതമാനത്തിൽ താഴെ മാത്രമാണ് മുതിർന്നവരായ ഉപയോക്താക്കൾ.
  


2020-ൽ ടിക് ടോക് നിരോധിച്ചത് വലിയ തിരിച്ചടിയായെങ്കിലും, അത് മറ്റ് ഇന്ത്യൻ, അന്തർദേശീയ ഹ്രസ്വ-ഫോം വീഡിയോ പ്ലാറ്റ്‌ഫോമുകൾ നികത്തി. 40 ശതമാനം ഉപയോക്താക്കളും ഈ പ്ലാറ്റ്‌ഫോമുകളിൽ ഓൺലൈനായി ഇടപാട് നടത്തുന്നതിനാൽ, ധനസമ്പാദന അവസരങ്ങൾ പലമടങ്ങാണ്. ഇ-കൊമേഴ്‌സ്, ഓൺലൈൻ ഗെയിമിംഗ്, ഒടിടി വീഡിയോ സ്ട്രീമിംഗ് സൈറ്റുകളിലെ ധനസമ്പാദന സൗകര്യങ്ങൾ ഉപയോക്താക്കൾക്കിടയിൽ പ്രചാരം നേടുന്നതായും റിപ്പോർട്ട് പറയുന്നു.

ആഗോള തലത്തിൽ ഹ്രസ്വ വീഡിയോ പ്ലാറ്റ്‌ഫോമുകൾ നഗര ഉപയോക്താക്കൾക്കിടയിൽ ജനപ്രിയമാണെങ്കിൽ, ഇന്ത്യയിൽ മെട്രോ ഇതര, അർധ നഗര പ്രദേശങ്ങളിലെ ജനങ്ങൾക്കിടയിലാണ് കൂടുതൽ താൽപ്പര്യം. ഇന്ത്യൻ ഉപയോക്താക്കളിൽ 45 ശതമാനവും അർദ്ധ-നഗര-ഗ്രാമീണ കേന്ദ്രങ്ങളിൽ താമസിക്കുന്നു, ഗെയിമിംഗ് മുതൽ ഇ-കൊമേഴ്‌സ് വരെയുള്ള വിവിധ ഇന്റർനെറ്റ് പ്ലാറ്റ്‌ഫോമുകളുമായി ഇവർ സംവദിക്കുന്നു.