അച്ഛന് സല്യൂട് നൽകുന്ന മകളും, അവൾക്ക് തിരിച്ച് സല്യൂട് നൽകുന്ന അച്ഛനും; കാണുന്നവരുടെ ഹൃദയം കീഴടക്കിയ ചിത്രം

ന്യൂഡെൽഹി: (www.kvartha.com 10.08.2021) അച്ഛനും മകളും പരസ്പരം സല്യൂട് നൽകുന്ന ചിത്രമാണ് ഇപ്പോൾ സോഷ്യൽ മീഡിയയിൽ കാഴ്ചക്കാരുടെ മനം കവരുന്നത്. ഇൻഡോ-ടിബറ്റൻ ബോർഡർ പൊലീസ് (ITBP) ഇൻസ്പെക്ടറായ കമലേഷ് കുമാറിന്റെ മകൾ ഇൻഡോ-ടിബറ്റൻ ബോർഡർ പൊലീസിൽ അസിസ്റ്റന്റ് കമാൻഡന്റായി ചേർന്നത് രണ്ട് ദിവസം മുൻപാണ്. അതിനോടനുബന്ധിച്ച് നടന്ന പാസിങ്ഔട് പരേഡിൽ മകളായ ദീക്ഷയെ അഭിവാദ്യം ചെയ്യാൻ കൈ ഉയർത്തുന്ന അദ്ദേഹത്തിന്റെ ചിത്രങ്ങളാണ് ഇപ്പോൾ വൈറലാകുന്നത്.

അച്ഛന് സല്യൂട് നൽകുന്ന മകളും, അവൾക്ക് തിരിച്ച് സല്യൂട് നൽകുന്ന അച്ഛനും. ഐടിബിപി 2016 -ൽ യുപിഎസ്‌സി പരീക്ഷകളിലൂടെയാണ് വനിതാ കോംബാറ്റ് ഓഫീസർമാരെ തെരഞ്ഞെടുത്തത്.

'മകളെ അഭിമാനത്തോടെ അഭിവാദ്യം ചെയ്യുന്നു. ഐടിബിപിയിൽ അസിസ്റ്റന്റ് കമാൻഡന്റായി ദിക്ഷ ചേർന്നു. മുസൂരിയിലെ ഐടിബിപി അകാദമിയിൽ പാസിങ്ഔട് പരേഡ് കഴിഞ്ഞ് ഐടിബിപിയിലെ ഇൻസ്‌പെക്ടർ കൂടിയായ അച്ഛൻ കമലേഷ് കുമാർ മകളെ സല്യൂട് ചെയ്യുന്നു'- ചടങ്ങിന്റെ ചിത്രങ്ങൾ ഔദ്യോഗിക ട്വിറ്ററിൽ പങ്കിടുന്നതിനിടെ ടിബറ്റൻ ബോർഡർ പൊലീസ് എഴുതി.