Controversy | മുസ്ലീം പക്ഷിക്ക് മാത്രം രാഹുല്‍ ഭക്ഷണം നല്‍കുന്നു, വലുതാകുമ്പോള്‍ മറ്റുള്ളവയെ കൊത്തി കൂട്ടില്‍നിന്ന് പുറത്താക്കുന്നു, ഇത് കണ്ട് സിദ്ധരാമയ്യ ചിരിക്കുന്നു; അധിക്ഷേപ വീഡിയോയ്‌ക്കെതിരെ പരാതിയുമായി കോണ്‍ഗ്രസ്

കര്‍ണാടക മുഖ്യമന്ത്രി സിദ്ധരാമയ്യ, രാഹുല്‍ ഗാന്ധി എന്നിവരുടെ കാരികേചറുകള്‍ ഉള്‍പെടുത്തി തയാറാക്കിയ ഒരു വീഡിയോ ശനിയാഴ്ചയാണ് കര്‍ണാടക ബിജെപിയുടെ ഔദ്യോഗിക എക്സ് ഹാന്‍ഡിലില്‍ പങ്കുവെച്ചത്. എസ് സി, എസ് ടി, ഒബിസി എന്നിങ്ങനെ എഴുതിയ മുട്ടകളുള്ള പക്ഷിക്കൂട്ടില്‍ രാഹുല്‍, മുസ്ലിം എന്നെഴുതിയ മുട്ട കൂടെ അതില്‍ കൊണ്ടുവെക്കുന്നു.

ഈ മുട്ടകള്‍ വിരിയുമ്പോള്‍, മുസ്ലിം എന്നെഴുതിയ മുട്ട വിരിഞ്ഞുണ്ടായ തൊപ്പി ധരിച്ച വലിയ പക്ഷിക്കുഞ്ഞിന് മാത്രം രാഹുല്‍ ഗാന്ധി 'ഫണ്ട്സ്' എന്നെഴുതിയ ഭക്ഷണം നല്‍കുന്നു. ഇത് സിദ്ധരാമയ്യ നോക്കി നില്‍ക്കുന്നു. ഭക്ഷണം ലഭിച്ച് വലുതായ പക്ഷി, ഭക്ഷണം ലഭിക്കാത്ത മറ്റ് മൂന്ന് പക്ഷിക്കുഞ്ഞുങ്ങളേയും കൂട്ടില്‍നിന്ന് പുറത്താക്കുന്നു. ഇത് കണ്ട് സിദ്ധരാമയ്യ ചിരിക്കുന്നു. ഇതായിരുന്നു വീഡിയോയുടെ ഉള്ളടക്കം.

സംസ്ഥാന മുഖ്യതിരഞ്ഞെടുപ്പ് ഓഫീസര്‍ക്ക് കര്‍ണാടക കോണ്‍ഗ്രസ് മീഡിയ ആന്‍ഡ് കമ്യൂണികേഷന്‍ ചെയര്‍മാന്‍ രമേഷ് ബാബുവാണ് പരാതി നല്‍കിയത്. എസ് സി/ എസ് ടി/ ഒബിസി. വിഭാഗങ്ങള്‍ക്കുള്ള തുക വെട്ടിച്ചുരുക്കുമെന്ന് തങ്ങളുടെ പ്രകടനപത്രികയില്‍ എവിടേയും പറയുന്നില്ലെന്നും എന്നാല്‍, ബിജെപി ഇത് ലോക് സഭാ തിരഞ്ഞെടുപ്പില്‍ വോട് ലഭിക്കാന്‍ വ്യാജ പ്രചാരണവേലയ്ക്ക് ഉപയോഗിക്കുന്നുവെന്നും പരാതിയില്‍ പറയുന്നുണ്ട്.