Blind cricket | പാകിസ്താന്റെ അന്ധരുടെ ക്രിക്കറ്റ് ടീമിന് ഇന്ത്യയിലെത്തി ടി20 ലോകകപ്പ് കളിക്കാൻ കേന്ദ്ര ആഭ്യന്തര മന്ത്രാലയം അനുമതി നൽകി; 34 പേർക്ക് അവസരം

ന്യൂഡെൽഹി: (www.kvartha.com) ഇന്ത്യയിൽ നടക്കുന്ന അന്ധരുടെ ടി20 ലോകകപ്പിനായി പാകിസ്ഥാൻ ടീമിനുള്ള വിസയ്ക്ക് കേന്ദ്ര ആഭ്യന്തര മന്ത്രാലയം അനുമതി നൽകി. അന്ധ ക്രിക്കറ്റ് ലോകകപ്പിൽ പങ്കെടുക്കാൻ 34 പാകിസ്ഥാൻ താരങ്ങൾക്കും ഉദ്യോഗസ്ഥർക്കും വിസ അനുവദിക്കുന്നതിന് ആഭ്യന്തര മന്ത്രാലയം അനുമതി നൽകിയതായി വിദേശകാര്യ മന്ത്രാലയത്തിലെ ഉദ്യോഗസ്ഥൻ അറിയിച്ചു.
                  
അതേസമയം ഇന്ത്യൻ വിദേശകാര്യ മന്ത്രാലയത്തിൽ നിന്ന് ടീമിന് വിസ അനുമതി ലഭിച്ചിട്ടില്ലെന്ന് പാകിസ്ഥാൻ ബ്ലൈൻഡ് ക്രിക്കറ്റ് കൗൺസിൽ (PBCC) അധികൃതർ പറഞ്ഞു. ഈ ദൗർഭാഗ്യകരമായ സംഭവം പാക്കിസ്ഥാന്റെ അന്ധ ക്രിക്കറ്റ് ടീമിനെ അനിശ്ചിതത്വത്തിലാക്കിയെന്നാണ് പരാതി. നിലവിലെ പ്രകടനം അനുസരിച്ച്, പാകിസ്ഥാൻ കിരീടം നേടാനുള്ള ശക്തമായ സാധ്യതയുണ്ടെന്ന് വിദഗ്ധർ സൂചിപ്പിച്ചിരുന്നു.

തിങ്കളാഴ്ചയാണ് (ഡിസംബർ അഞ്ച്) ലോകകപ്പിന് തുടക്കമായത്. ഡിസംബർ 17 വരെ തുടരും. ഇന്ത്യ, ബംഗ്ലാദേശ്, ഓസ്‌ട്രേലിയ, നേപ്പാൾ, ശ്രീലങ്ക, ദക്ഷിണാഫ്രിക്ക, പാകിസ്ഥാൻ എന്നീ രാജ്യങ്ങളാണ് പങ്കടുക്കുന്നത്. മത്സരങ്ങൾ ഫരീദാബാദ്, ഡെൽഹി, മുംബൈ, ഇൻഡോർ, ബെംഗളൂരു എന്നിവിടങ്ങളിൽ നടക്കും. ബെംഗളൂരുവിലാണ് ഫൈനൽ. കഴിഞ്ഞ തവണ പാകിസ്ഥാൻ രണ്ടാം സ്ഥാനത്തായിരുന്നു.