നരേന്ദ്രമോഡിയും രണ്ട് ഭാര്യമാരും

അഹമ്മദാബാദ്: ഗുജറാത്തിലെ തിരഞ്ഞെടുപ്പ് രംഗം ചൂടുപിടിക്കവേ മുഖ്യമന്ത്രി മോഡിക്ക് സമാനമായ പ്രശസ്തിയിലേയ്ക്കുയരുകയാണ് രണ്ട് ഭാര്യമാർ. മണിനഗറിൽ നിന്നും മോഡിക്കെതിരെ മൽസരിക്കുന്ന ശ്വേത ഭട്ടും ഗുജറാത്ത് മുൻ ആഭ്യന്തരമന്ത്രി ഹരേൻ പാണ്ഡ്യയുടെ ഭാര്യ ജഗ്രുതി പാണ്ഡ്യയുമാണ് പ്രശസ്തരായ രണ്ട് വനിതകൾ. സസ്പെൻഷനിലായ സഞ്ജീവ് ഭട്ട് ഐപിഎസിന്റെ ഭാര്യയാണ് ശ്വേതാ ഭട്ട്. കോൺഗ്രസിന്റെ പിന്തുണയോടെയാണ് ശ്വേത മോഡിക്കെതിരെ മൽസര രംഗത്തേയ്ക്കിറങ്ങിയത്.

2002ൽ ഗുജറാത്ത് ആഭ്യന്തരമന്ത്രിയായിരുന്ന ഹരേൺ പാണ്ഡ്യയുടെ ഭാര്യ ജഗ്രുതി പാണ്ഡ്യ വലത് വിഎച്ച്പിയുടെ പിന്തുണയോടെയാണ് മൽസരരംഗത്തുള്ളത്. ശ്വേതാ ഭട്ടും ജഗ്രുതി പാണ്ഡ്യയും രണ്ട് വിത്യസ്ത ആശയങ്ങളുള്ള രാഷ്ട്രീയപാർട്ടികളിലെ മൽസരാർത്ഥികളാണെങ്കിലും ഇരുവരുടേയും തിരഞ്ഞെടുപ്പ് പ്രചാരണത്തിന് സമാനതകളുണ്ട്. ഇരുവരും ലക്ഷ്യമിടുന്നത് മോഡിയെയാണ്. ഗുജറാത്ത് വംശഹത്യയിൽ മോഡിയുടെ പങ്ക് ജനങ്ങൾക്കിടയിലേയ്ക്ക് എത്തിക്കാനാണ് ഇരുവരും തിരഞ്ഞെടുപ്പ് പ്രചാരണപരിപാടികളെ പരമാവധി പ്രയോജനപ്പെടുത്തുന്നത്. ബിജെപിയിലെ പ്രബലനായ കേശുഭായ് പട്ടേലിന്റെ പരോക്ഷമായ പിന്തുണ ജഗ്രുതിക്ക് ലഭിക്കുന്നുണ്ടെന്നതിനാൽ തന്നെ മോഡിക്കെതിരെ ശക്തമായ പടവാളായാണ് വലത് വിഎച്ച്പി ജഗ്രുതിയെ ഉയർത്തിക്കൊണ്ടുവന്നിരിക്കുന്നത്.