രാഷ്ട്രീയപാര്‍ട്ടികള്‍ ഏഴ് വര്‍ഷം കൊണ്ട് സമ്പാദിച്ചത് 4,662 കോടി

ന്യൂഡല്‍ഹി: രാജ്യത്തെ വിവിധ രാഷ്ട്രീയ പാര്‍ട്ടികള്‍ ഏഴ് വര്‍ഷം കൊണ്ട് സമ്പാദിച്ചത് 4,662 കോടി രൂപ. സംഭാവനകളിലൂടെ 2004 മുതല്‍ രാഷ്ട്രീയ പാര്‍ട്ടികള്‍ സമ്പാദിച്ച തുകയാണ്‌ ഇത്. ഏറ്റവും കൂടുതല്‍ പണം പിരിച്ചത് കോണ്‍ഗ്രസാണ്‌, 2,008 കോടി. ബിജെപി 994 കോടി രൂപയാണ്‌ പിരിച്ചത്. അസോസിയേഷന്‍ ഫോര്‍ ഡെമോക്രാറ്റിക് റിഫോംസ് (എ.ഡി.ആര്‍), നാഷണല്‍ ഇലക്ഷന്‍ വാച്ച് (എന്‍.ഇ.ഡബ്ല്യൂ) എന്നിവയാണ്‌ റിപോര്‍ട്ട് പുറത്തുവിട്ടിരിക്കുന്നത്. 23 രാഷ്ട്രീയ പാര്‍ട്ടികളുടെ വരുമാനം ഇവര്‍ പ്രസിദ്ധീകരിച്ചിട്ടുണ്ട്.

കോണ്‍ഗ്രസ് ധനം സമ്പാദിച്ചത് പ്രധാനമായും കൂപ്പണുകളുടെ വില്‍പനയിലൂടെയാണ്‌/ 2004 മുതല്‍ 2011 വരെ കേന്ദ്രഭരണം കോണ്‍ഗ്രസിനായതിനാല്‍ ഇക്കാലയളവില്‍ കൂടുതല്‍ കൂപ്പണുകള്‍ വിറ്റഴിച്ചതായാണ്‌ എ.ഡി.ആര്‍ വ്യക്തമാക്കുന്നത്. ആകെ വരുമാനത്തിന്റെ 14.42 ശതമാനം മാത്രമാണ്‌ സംഭാവനയായി പാര്‍ട്ടിക്ക് ലഭിച്ചിട്ടുള്ളത്.

എന്നാല്‍ ബിജെപിയുടെ വരുമാനത്തിന്റെ 81.47 ശതമാനവും ട്രസ്റ്റുകളില്‍ നിന്നും സംഘടനകളില്‍ നിന്നുമുള്ള സംഭാവനയാണ്‌. ഇത് രാഷ്ട്രീയപാര്‍ട്ടികളുടെ ബ്ലാക്ക് ബോക്സാണെന്നും ഇത്തരത്തിലുള്ള വരുമാനമാണ്‌ രാജ്യത്ത് അഴിമതിക്ക് കാരണമാകുന്നതെന്നും എ.ഡി.ആറിന്റെ സ്ഥാപക അംഗമായ പ്രൊഫ. ജഗ്ദീ ചോക്കര്‍ ആരോപിച്ചു.

അതേസമയം ആദിത്യ ബിര്‍ള ഗ്രൂപ്പും ടോറന്റ് പവര്‍ ലിമിറ്റഡും ഒരേസമയം ബിജെപിക്കും കോണ്‍ഗ്രസിനും സംഭാവനകള്‍ നല്‍കിയിട്ടുണ്ട്.