S C Verdict | സന്ദേശ്ഖാലി കേസിൽ മമതയ്ക്ക് ആശ്വാസം; ബംഗാൾ സർക്കാർ ഉദ്യോഗസ്ഥർക്കെതിരായ പാർലമെൻ്ററി സമിതിയുടെ അന്വേഷണം സുപ്രീം കോടതി വിലക്കി

പശ്ചിമ ബംഗാൾ ചീഫ് സെക്രട്ടറി, സംസ്ഥാന പൊലീസ് ഡയറക്ടർ ജനറൽ, ജില്ലാ മജിസ്‌ട്രേറ്റ്, പൊലീസ് സൂപ്രണ്ട്, പൊലീസ് സ്റ്റേഷൻ ഇൻചാർജ് എന്നിവരോട് തിങ്കളാഴ്ച ഹാജരാകാൻ പാർലമെൻ്റിൻ്റെ പ്രത്യേകാവകാശ സമിതി ഉത്തരവിട്ടിരുന്നു. കഴിഞ്ഞയാഴ്ച ബിജെപി എംപിമാരുമൊത്ത് സ്ഥലം സന്ദർശിക്കുന്നതിനിടെ ബാലുർഘട്ട് എംപി കൂടിയായ മജുംദാറിനോട് പൊലീസ് മോശമായി പെരുമാറിയെന്നാണ് ആരോപണം. ബിജെപി എംപി ലോക്‌സഭയിലെ പ്രിവിലേജസ് കമ്മിറ്റിക്ക് പരാതി നൽകിയതിനെത്തുടർന്നാണ് കമ്മിറ്റി പശ്ചിമ ബംഗാൾ ചീഫ് സെക്രട്ടറിയേയും മമത സർക്കാരിലെ മറ്റ് ഉന്നത ഉദ്യോഗസ്ഥരേയും ചോദ്യം ചെയ്യാൻ വിളിപ്പിച്ചത്.

ഇതാണ് കേസ്

തൃണമൂൽ നേതാവും പ്രാദേശിക ശക്തനുമായ ഷെയ്ഖ് സഹജനുമായി ബന്ധപ്പെട്ട കേസാണിത്. തൃണമൂല്‍ നേതാക്കള്‍ സ്ത്രീകള്‍ക്ക് നേരെ ലൈംഗികാതിക്രമം നടത്തിയെന്നും ഭൂമി തട്ടിയെടുക്കാന്‍ ശ്രമിച്ചുവെന്നുമാരോപിച്ച് സന്ദേശ്ഖാലിയില്‍ പ്രതിഷേധങ്ങള്‍ നടന്നുവരികയായിരുന്നു. സംഭവത്തിൽ രണ്ട് സഹായികളായ ഉത്തം സർദാറും ഷിബു പ്രസാദ് ഹസ്രയും അറസ്റ്റിലായെങ്കിലും ഷെയ്ഖ് സഹജൻ ഇപ്പോഴും ഒളിവിലാണ്. തങ്ങളെ ഉപദ്രവിക്കുകയും ഭീഷണിപ്പെടുത്തുകയും ചെയ്തതായി സ്ത്രീകൾ തന്നോട് പറഞ്ഞതായി സന്ദേശ്ഖാലി സന്ദർശിച്ച ഗവർണർ സിവി ആനന്ദ് ബോസ് പറഞ്ഞിരുന്നു.

ഇതിനിടയിൽ കഴിഞ്ഞയാഴ്ച സന്ദേശ്ഖാലി സന്ദർശിച്ച ദേശീയ പട്ടികജാതി കമ്മീഷൻ സംസ്ഥാനത്ത് രാഷ്ട്രപതി ഭരണത്തിന് ശുപാർശ ചെയ്തിരുന്നു. എന്നാൽ സന്ദേശ്ഖാലിയില്‍ നടന്ന അനിഷ്ട സംഭവങ്ങള്‍ക്ക് പിന്നില്‍ ബിജെപിയാണെന്നാണ് മുഖ്യമന്ത്രി മമത ബാനർജിയുടെ ആരോപണം. സന്ദേശ്ഖാലിയിലെ ഒരു സ്ത്രീ പോലും പരാതിയുമായി എത്തിയിരുന്നില്ലെന്നും ഒടുവില്‍ സ്വമേധയാ കേസെടുക്കാന്‍ പൊലീസിനോട് താന്‍ ഉത്തരവിടുകയായിരുന്നുവെന്നും മമത പറഞ്ഞു.