ഹൈദരാബാദ്: (KVARTHA) തെലങ്കാനയില്‍ നിര്‍മാണപ്രവൃത്തികള്‍ക്കിടെ തുരങ്കം തകര്‍ന്ന് നിരവധി തൊഴിലാളികള്‍ കുടുങ്ങിയതായി റിപ്പോർട്ട്. നാഗർകുർണൂൽ ജില്ലയിലാണ് അപകടം സംഭവിച്ചത്. തെലങ്കാനയുടെ തലസ്ഥാന നഗരമായ ഹൈദരാബാദിൽ നിന്ന് ഏകദേശം 120 കിലോമീറ്റർ അകലെയാണ് ഈ ജില്ല. ശ്രീശൈലം അണക്കെട്ടിന് പിന്നിലുള്ള തുരങ്കത്തിന്റെ ഒരു ഭാഗത്ത് ചോർച്ച പരിഹരിക്കാൻ ചില തൊഴിലാളികൾ അകത്ത് കയറിയപ്പോഴായിരുന്നു അപകടം.

തുരങ്കത്തിൽ 12-13 കിലോമീറ്റർ ഉള്ളിലാണ് അപകടം നടന്നത്. അപകടത്തിൽ ചില തൊഴിലാളികൾക്ക് പരിക്കേറ്റതായി മുഖ്യമന്ത്രി എ രേവന്ത് റെഡ്ഡിയുടെ ഓഫീസ് പ്രസ്താവനയിൽ അറിയിച്ചു. തൊഴിൽ ചെയ്യുന്ന കമ്പനി നൽകിയ വിവരമനുസരിച്ച് ആറോ എട്ടോ തൊഴിലാളികൾ കുടുങ്ങിയിരിക്കാൻ സാധ്യതയുണ്ടെന്ന് മുതിർന്ന പൊലീസ് ഉദ്യോഗസ്ഥൻ പറഞ്ഞു. ജോലിയുടെ ഭാഗമായി ചില തൊഴിലാളികൾ അകത്തേക്ക് പോയപ്പോൾ തുരങ്കത്തിന്റെ മേൽക്കൂര ഇടിഞ്ഞു വീഴുകയായിരുന്നുവെന്ന് ഉദ്യോഗസ്ഥൻ കൂട്ടിച്ചേർത്തു.

അപകടത്തിന്റെ വ്യാപ്തി വിലയിരുത്തുന്നതിനായി നിർമാണ കമ്പനിയിൽ നിന്നുള്ള ഒരു സംഘം തുരങ്കത്തിനുള്ളിൽ പ്രവേശിച്ചതായി മുതിർന്ന പൊലീസ് ഉദ്യോഗസ്ഥനെ ഉദ്ധരിച്ച് പിടിഐ റിപ്പോർട്ട് ചെയ്തു. സംഭവത്തെക്കുറിച്ച് അറിഞ്ഞ ഉടൻ തന്നെ രക്ഷാപ്രവർത്തനങ്ങൾ ഏകോപിപ്പിക്കാൻ നാഗർകുർണൂൽ ജില്ലാ കളക്ടർ, പൊലീസ് സൂപ്രണ്ട്, മറ്റ് ഉദ്യോഗസ്ഥർ എന്നിവർക്ക് അപകടസ്ഥലത്തേക്ക് പോകാൻ മുഖ്യമന്ത്രി എ. രേവന്ത് റെഡ്ഡി നിർദ്ദേശം നൽകി. ജലസേചന മന്ത്രി എൻ ഉത്തം കുമാർ റെഡ്ഡി അടക്കമുള്ളവർ പ്രത്യേക ഹെലികോപ്റ്ററിൽ സംഭവസ്ഥലത്തേക്ക് തിരിച്ചു.

30 ട്രില്യൺ മെട്രിക് ടൺ ശേഷിയുള്ള ഈ തുരങ്കത്തിലൂടെ പ്രതിദിനം നാലായിരം ക്യുസെക്‌സ് വെള്ളം നൽഗൊണ്ടയിലേക്ക് എത്തിക്കാൻ കഴിയുമെന്ന് തെലങ്കാന ജലസേചന മന്ത്രി ഉത്തം കുമാർ റെഡ്ഡി കഴിഞ്ഞ വർഷം പറഞ്ഞിരുന്നു. അടച്ചിട്ടിരിക്കുകയായിരുന്ന തുരങ്കം നാലുദിവസം മുമ്പാണ് തുറന്നത്. കുടുങ്ങിക്കിടക്കുന്ന തൊഴിലാളികളെ രക്ഷിക്കാനുള്ള ശ്രമങ്ങൾ ഊർജ്ജിതമായി നടക്കുന്നു.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക 
 A tunnel collapse during construction in Telangana has trapped several workers. Efforts to rescue them are ongoing.

 #TunnelCollapse, #TelanganaNews, #WorkerRescue, #Accident, #Construction, #Telangana