Shashi Tharoor | ഗുജറാതില്‍ കോണ്‍ഗ്രസിനായി താന്‍ പ്രചാരണം നടത്തിയിട്ടില്ല; അതുകൊണ്ടുതന്നെ തിരഞ്ഞെടുപ്പു തോല്‍വിയെ കുറിച്ച് മറുപടി പറയാന്‍ ബുദ്ധിമുട്ടാണെന്ന് ശശി തരൂര്‍

ന്യൂഡെല്‍ഹി: (www.kvartha.com) ഗുജറാതില്‍ കോണ്‍ഗ്രസിനായി താന്‍ പ്രചാരണം നടത്തിയിട്ടില്ല, അതുകൊണ്ടുതന്നെ തിരഞ്ഞെടുപ്പു തോല്‍വിയെ കുറിച്ച്  മറുപടി പറയാന്‍ ബുദ്ധിമുട്ടാണെന്ന് പ്രചാരണ രംഗത്തുനിന്ന് മാറ്റിനിര്‍ത്തപ്പെട്ട മുതിര്‍ന്ന നേതാവ് ശശി തരൂര്‍. 

ഒരു ദേശീയ മാധ്യമത്തോടാണ് തരൂര്‍ ഇക്കാര്യം അറിയിച്ചത്. ഗുജറാത് നിയമസഭാ തിരഞ്ഞെടുപ്പില്‍ ചരിത്രത്തിലെ ഏറ്റവും മോശം പ്രകടനവുമായി കോണ്‍ഗ്രസ് വന്‍ തോല്‍വിയാണ് ഏറ്റുവാങ്ങിയത്.

തരൂരിന്റെ പ്രതികരണം:

ഗുജറാതില്‍ കോണ്‍ഗ്രസിനായി താന്‍ പ്രചാരണം നടത്തിയിട്ടില്ല. അവിടെ തിരഞ്ഞെടുപ്പ് പ്രചാരണം നടത്താന്‍ പാര്‍ടി തയാറാക്കിയ പട്ടികയിലും തന്റെ പേരുണ്ടായിരുന്നില്ല. അതുകൊണ്ടുതന്നെ തിരഞ്ഞെടുപ്പു തോല്‍വിയെക്കുറിച്ച് മറുപടി പറയാന്‍ കഴിയില്ല. ഞാന്‍ കോണ്‍ഗ്രസിനായി ഗുജറാതില്‍ പ്രചാരണ രംഗത്തുണ്ടായിരുന്നില്ല.

പ്രചാരണം നടത്താന്‍ നിയോഗിക്കപ്പെട്ട നേതാക്കളുടെ കൂട്ടത്തിലും എന്റെ പേരുണ്ടായിരുന്നില്ല. അവിടെ പോയി പ്രചാരണം നടത്താനോ അവിടുത്തെ സാഹചര്യം മനസ്സിലാക്കാനോ സാധിക്കാത്തതിനാല്‍, തിരഞ്ഞെടുപ്പ് തോല്‍വിയെക്കുറിച്ച് മറുപടി നല്‍കാന്‍ ബുദ്ധിമുട്ടാണ്.

ഹിമാചല്‍ പ്രദേശില്‍ ബിജെപിക്കെതിരായ ഭരണവിരുദ്ധ വികാരം കോണ്‍ഗ്രസിനെ തുണച്ചിട്ടുണ്ടെന്നാണ് വ്യക്തമാക്കുന്നത്. പക്ഷേ, ഗുജറാതില്‍ അതുണ്ടായില്ല. ആംആദ്മി പാര്‍ടി പിടിച്ച വോടുകളും കോണ്‍ഗ്രസിന്റെ വോടു കുറയാന്‍ ഇടയാക്കിയിട്ടുണ്ട്.

നേരത്തെ, മുതിര്‍ന്ന നേതാവ് മല്ലികാര്‍ജുന്‍ ഖര്‍ഗെക്കെതിരെ കോണ്‍ഗ്രസ് അധ്യക്ഷ സ്ഥാനത്തേക്ക് മത്സരിച്ചതിനു പിന്നാലെ ഗുജറാതിലെയും ഹിമാചല്‍ പ്രദേശിലെയും കോണ്‍ഗ്രസ് പ്രചാരകരുടെ പട്ടികയില്‍ നിന്ന് തരൂരിനെ ഒഴിവാക്കിയിരുന്നു.