Stray Cows Shelter | എല്ലാ ജില്ലയിലും ദിവസവും കുറഞ്ഞത് 10 അലഞ്ഞുതിരിയുന്ന പശുക്കള്‍ക്ക് അഭയം നല്‍കാന്‍ യോഗി സര്‍കാര്‍; യുപിയില്‍ 11,84,494 ലക്ഷം അനാഥ കന്നുകാലികള്‍
Jul 19, 2022, 15:21 IST
ലക്‌നൗ: (www.kvartha.com) സംസ്ഥാനത്തെ 75 ജില്ലകളിലും ഓരോ ദിവസവും കുറഞ്ഞത് 10 അലഞ്ഞുതിരിയുന്ന പശുക്കള്‍ക്ക് അഭയം നല്‍കുക എന്ന ലക്ഷ്യവുമായി യോഗി സര്‍കാര്‍. കന്നുകാലിക്കൂട്ടം അലഞ്ഞുതിരിയുന്നത് ഇക്കഴിഞ്ഞ യുപി നിയമസഭാ തെരഞ്ഞെടുപ്പില്‍ ശക്തമായ വിഷയമായിരുന്നു. മൃഗസംരക്ഷണ മന്ത്രി ധരംപാല്‍ സിംഗ് പറയുന്നതനുസരിച്ച്, സംസ്ഥാനത്ത് നിലവില്‍ 6,222 പശുസംരക്ഷണ കേന്ദ്രങ്ങളുണ്ട്, ഉടമകളില്ലാത്ത 8.55 ലക്ഷം കന്നുകാലികളെ ഇവിടങ്ങളില്‍ പാര്‍പിക്കുന്നു.
ഈ വര്‍ഷം ഏപ്രില്‍ മുതല്‍ സംസ്ഥാനത്ത് 66,000 പശു മൃഗങ്ങളെ പുനരധിവസിപ്പിച്ചിട്ടുണ്ടെന്ന് അദ്ദേഹം വ്യക്തമാക്കി. 400 മൃഗങ്ങളെ പാര്‍പിക്കാവുന്ന വലിയ ഗോശാലകള്‍ ബ്ലോക് തലത്തില്‍ നിര്‍മിക്കുന്നുണ്ടെന്ന് അദ്ദേഹം പറഞ്ഞു. ഉത്തര്‍പ്രദേശില്‍ ഇത്തരത്തിലുള്ള 225 ഷെല്‍ടറുകള്‍ ഉണ്ടെന്നും ഈ വര്‍ഷം അവസാനത്തോടെ ഇത് 280 ആക്കാനാണ് പദ്ധതിയെന്നും ഓരോ ജില്ലയും ദിവസവും 10 തെരുവു പശുക്കളെയെങ്കിലും പുനരധിവസിപ്പിക്കണമെന്ന് ആവശ്യപ്പെട്ടിട്ടുള്ളതിനാല്‍ യുദ്ധകാലാടിസ്ഥാനത്തിലാണ് പ്രവര്‍ത്തനങ്ങള്‍ നടക്കുന്നതെന്നും മന്ത്രി പറഞ്ഞു.
'ഭാരതീയ പൈതൃകത്തില്‍ കന്നുകാലികളെ മറ്റെല്ലാ സ്വത്തുക്കള്‍ക്കും മുകളിലാണ് കാണുന്നത്. 'ഗോമാതാവിന്' അര്‍ഹമായ സുരക്ഷയും ബഹുമാനവും നല്‍കാന്‍ ഞങ്ങള്‍ പ്രവര്‍ത്തിക്കുന്നു,' ധരംപാല്‍ സിംഗ് പിടിഐയോട് പറഞ്ഞു.
കേന്ദ്ര ഫിഷറീസ്, മൃഗസംരക്ഷണ, ക്ഷീര മന്ത്രാലയത്തിന്റെ 2019 ലെ കണക്കുകള്‍ പ്രകാരം, ഉത്തര്‍പ്രദേശില്‍ 11,84,494 അലഞ്ഞുതിരിയുന്ന കന്നുകാലികളുണ്ട്, ഇത് രാജ്യത്തെ ഏറ്റവും ഉയര്‍ന്ന കണക്കാണ്. റോഡിലൂടെയുള്ള യാത്രക്കാര്‍ക്ക് ഭീഷണിയുയര്‍ത്തുന്നതിന് പുറമേ, ഈ അലഞ്ഞുതിരിയുന്ന മൃഗങ്ങള്‍ കൃഷി നശിപ്പിക്കുകയും ചെയ്യുന്നു.
ഈയിടെ സമാപിച്ച നിയമസഭാ തെരഞ്ഞെടുപ്പില്‍ സംസ്ഥാനത്തെ ബിജെപി സര്‍കാരിനെ ആക്രമിക്കാന്‍ പ്രതിപക്ഷം ആയുധമാക്കിയത് അലഞ്ഞുതിരിയുന്ന പശുക്കളെയായിരുന്നു. സംസ്ഥാനത്തുടനീളം 65 ലക്ഷം ഹെക്ടര്‍ മേച്ചില്‍പ്പുറങ്ങള്‍ സര്‍കാര്‍ കണ്ടെത്തിയിട്ടുണ്ട്, ഇതില്‍ ഭൂരിഭാഗവും സ്വകാര്യ കൃഷിക്കോ മറ്റ് പ്രവര്‍ത്തനങ്ങള്‍ക്കോ വേണ്ടി കൈയേറിയതാണ്. ഇത്തരം ഭൂമികള്‍ വൃത്തിയാക്കി കാലിത്തീറ്റ വളര്‍ത്തുന്നതിന് ലഭ്യമാക്കുന്നതിനുള്ള നടപടി പുരോഗമിക്കുകയാണെന്ന് മന്ത്രി പറഞ്ഞു.
'സംസ്ഥാനത്തുടനീളമുള്ള പശുസംരക്ഷണ കേന്ദ്രങ്ങളില്‍ കൂടുതല്‍ കൂടുതല്‍ അലഞ്ഞുതിരിയുന്ന കന്നുകാലികളെ പുനരധിവസിപ്പിക്കും. ഈ കേന്ദ്രങ്ങള്‍ സ്വയം പര്യാപ്തമാക്കാന്‍ ഞങ്ങള്‍ പ്രവര്‍ത്തിക്കുന്നു,' സിംഗ് പറഞ്ഞു. സംസ്ഥാനത്ത് അലഞ്ഞുതിരിയുന്ന കന്നുകാലികളെ പുനരധിവസിപ്പിക്കുന്നതിനുള്ള 90 ശതമാനത്തോളം പ്രവൃത്തികള്‍ പൂര്‍ത്തിയായതായും ബാക്കിയുള്ളവ ഈ വര്‍ഷം അവസാനത്തോടെ പൂര്‍ത്തിയാക്കുമെന്നും അദ്ദേഹം പറഞ്ഞു.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
