Attacked | 'സ്വാമി പ്രസാദ് മൗര്യക്ക് നേരെ ചെരുപ്പൂരിയെറിഞ്ഞ് അഭിഭാഷക വേഷത്തിലെത്തിയ യുവാവ്; പൊലീസ് നോക്കിനില്‍ക്കെ കൈകാര്യം ചെയ്ത് പ്രവര്‍ത്തകര്‍'; ദൃശ്യങ്ങള്‍ സമൂഹ മാധ്യമങ്ങളില്‍ വൈറല്‍

ലക് നൗ: (www.kvartha.com) സമാജ് വാദി പാര്‍ടിയുടെ വിവാദ നേതാവ് സ്വാമി പ്രസാദ് മൗര്യക്ക് നേരെ ചെരുപ്പൂരിയെറിഞ്ഞ യുവാവിന്റെ ദൃശ്യങ്ങള്‍ സമൂഹ മാധ്യമങ്ങളില്‍ വൈറല്‍. അഭിഭാഷക വേഷത്തിലെത്തിയ ആകാശ് സൈനി എന്ന യുവാവാണ് പാര്‍ടിയുടെ ഒബിസി മീറ്റിങ്ങിനിടെ മൗര്യക്ക് നേരെ ചെരുപ്പൂരിയെറിഞ്ഞതെന്ന് പൊലീസ് പറഞ്ഞു. ആക്രമണത്തിന്റെ കാരണം വ്യക്തമല്ല.

ചെരുപ്പൂരിയെറിയുന്നതിന്റേയും യുവാവിനെ പ്രവര്‍ത്തകര്‍ അക്രമിക്കുന്നതിന്റേയും ദൃശ്യങ്ങളാണ് പുറത്തുവന്നത്. പൊലീസ് നോക്കിനില്‍ക്കെയായിരുന്നു യുവാവിനെ പാര്‍ടി പ്രവര്‍ത്തകര്‍ മര്‍ദിച്ചതെന്ന് പുറത്തുവന്ന ദൃശ്യങ്ങളില്‍ നിന്നും വ്യക്തമാകാം.

അക്രമി ആരാണെന്നും മൗര്യക്ക് നേരെയുള്ള ആക്രമണത്തിന് പിന്നിലെ കാരണമെന്താണെന്നുമുള്ള മാധ്യമപ്രവര്‍ത്തകരുടെ ചോദ്യത്തിന് മറുപടി നല്‍കുന്നതിന് മുമ്പുതന്നെ പൊലീസ് യുവാവിനെ ഒടോ റിക്ഷയില്‍ കയറ്റി കൊണ്ടുപോകുകയായിരുന്നു.

തനിക്ക് നേരെയുള്ള ആക്രമണം പരാജയപ്പെട്ടുവെന്നായിരുന്നു വിഷയത്തില്‍ മൗര്യയുടെ പ്രതികരണം. 'എനിക്ക് നേരെ ചെരുപ്പൂരിയെറിഞ്ഞ് യുവാവ് നടത്താന്‍ ശ്രമിച്ച ആക്രമണം സമ്പൂര്‍ണ പരാജയമായിരുന്നു. യുവാവിനെ പിന്നീട് പ്രവര്‍ത്തകര്‍ കയ്യേറ്റം ചെയ്യുകയും പൊലീസ് കസ്റ്റഡിയിലെടുക്കുകയും ചെയ്തു' എന്ന് മൗര്യ മാധ്യമങ്ങളോട് പ്രതികരിച്ചു.