ലോട്ടറി കച്ചവടക്കാരന്‍ തലക്കടിയേറ്റ് മരിച്ചനിലയില്‍

കൊച്ചി: ലോട്ടറി കച്ചവടക്കാരനെ കടത്തിണ്ണയില്‍ തലക്കടിയേറ്റ് മരിച്ച നിലയില്‍ കണ്ടെത്തി. കലൂര്‍ ആസാദ് റോഡിലെ കടത്തിണ്ണയില്‍ ഉറങ്ങിക്കിടക്കുകയായിരുന്ന പരമന്‍(72) ആണ് കൊല്ലപ്പെട്ടത്. മൃതദേഹത്തിന് സമീപത്തായി  ഇഷ്ടികയും ഇളനീരും കണ്ടെത്തി.  ഇവ കൊണ്ട് ആക്രമിച്ച് കൊലപ്പെടുത്തുകയായിരുന്നുവെന്ന് സംശയിക്കുന്നു.

ആസാദ് റോഡിലെ ചേരാത്രിക്കാവ്  ക്ഷേത്രത്തിനെതിര്‍വശത്തുള്ള കടത്തിണ്ണയിലാണ് മൃതദേഹം കാണപ്പെട്ടത്. പരമന്‍ സ്ഥിരമായി ഇതേ കടത്തിണ്ണയിലായിരുന്നു കിടന്നുറങ്ങാറുള്ളത്. അവിവാഹിതനാണ്. ഇയാള്‍ക്ക് കാഴ്ചശക്തിക്ക് കുറവുള്ളതായി നാട്ടുകാര്‍ പറഞ്ഞു.

ആസാദ് റോഡിലെ വൈലോപ്പിള്ളി ലെയിനിലാണ് പരമന്റെ വീട്.  എന്നാല്‍
സ്വത്ത് ഭാഗം വെച്ചു പിരിഞ്ഞതിനു ശേഷം പരമന്‍ വീട്ടില്‍ പോകാതെ സ്ഥിരമായി  കടത്തിണ്ണയില്‍ തന്നെയായിരുന്നു താമസിച്ചിരുന്നത്. നോര്‍ത്ത് പോലീസ് കേസെടുത്തു അന്വേഷണം ആരംഭിച്ചു.  കൊച്ചിയില്‍ മുമ്പും ഇത്തരത്തില്‍ റിപ്പര്‍ മോഡല്‍ ആക്രണമുണ്ടായിരുന്നു.
മഅ്ദനിക്ക് നീതി ലഭ്യമാക്കുന്നവര്‍ക്ക് ലോകസഭാ തെരഞ്ഞെടുപ്പില്‍ പി.ഡി.പിയുടെ പിന്തുണ