മലപ്പുറം: (KVARTHA) ശനിയാഴ്ച പാലക്കാട്-കോഴിക്കോട് ദേശീയപാതയിൽ അങ്ങാടിപ്പുറം തിരൂർക്കാട് കെ.എസ്.ആർ.ടി.സി. ബസും ലോറിയും കൂട്ടിയിടിച്ചുണ്ടായ ദാരുണമായ അപകടത്തിൽ പരിക്കേറ്റ് ചികിത്സയിലായിരുന്ന ഒരു വിദ്യാർഥിനി കൂടി മരണത്തിന് കീഴടങ്ങിയതോടെ ദുരന്തം കവർന്നത് രണ്ട് ജീവനുകൾ. മലപ്പുറം വണ്ടൂർ കുരിക്കുണ്ട് പാറാഞ്ചേരി സ്വദേശി നൗഷാദിൻ്റെ മകൾ ഷൻഫ (20) ആണ് പെരിന്തൽമണ്ണയിലെ ആശുപത്രിയിൽ ചികിത്സയിലിരിക്കെ മരണപ്പെട്ടത്. തലയ്ക്ക് ഗുരുതരമായി പരിക്കേറ്റ ഷൻഫ തീവ്രപരിചരണ വിഭാഗത്തിൽ ചികിത്സയിലായിരുന്നു. മണ്ണാർക്കാട് മേലെ അരിയൂർ വാരിയത്ത് ഹരിദാസ്-രാധ ദമ്പതികളുടെ മകൾ ശ്രീനന്ദ (21) ആണ് ശനിയാഴ്ച മരിച്ചത്. 

കോഴിക്കോട് ജെ.ഡി.റ്റി. ഇസ്ലാം കോളേജ് ഓഫ് ഫിസിയോതെറാപ്പിയിലെ രണ്ടാം വർഷ വിദ്യാർഥിനിയായിരുന്നു ഷൻഫ. ഹോസ്റ്റലിൽ താമസിക്കുന്ന ഷൻഫ ശനിയാഴ്ച വൈകുന്നേരം നോമ്പുതുറക്കുന്നതിനായി ഉമ്മയുടെ വീട്ടിലേക്ക് പോകുകയായിരുന്നു. ഇതിനിടയിലാണ് യാത്രാമധ്യേ അപകടം സംഭവിച്ചത്. ഞായറാഴ്ച രാത്രി 9:30 മണിയോടെ വണ്ടൂർ ജുമാമസ്‌ജിദ് ഖബർസ്ഥാനിൽ ഖബറടക്കും. സലീനയാണ് ഷൻഫയുടെ മാതാവ്. സഫ്ന, ഷംന എന്നിവരാണ് സഹോദരിമാർ.

മണ്ണാർക്കാട് യൂണിവേഴ്സൽ ആർട്‌സ് ആൻഡ് സയൻസ് കോളേജിലെ അവസാന വർഷ ബി.എസ്.സി. കമ്പ്യൂട്ടർ സയൻസ് വിദ്യാർഥിനിയായിരുന്ന ശ്രീനന്ദ, കോളേജിലെ പ്രോജക്റ്റിന്റെ ആവശ്യത്തിനായി കൂട്ടുകാരികളോടൊപ്പം കോഴിക്കോട് പോയി തിരികെ വരുന്ന വഴിയായിരുന്നു അപകടത്തിൽപ്പെട്ടത്. ഇരുവരുടെയും ആകസ്മികമായ വിയോഗം കുടുംബാംഗങ്ങളെയും സുഹൃത്തുക്കളെയും നാട്ടുകാരെയും ഒരുപോലെ ദുഃഖത്തിലാഴ്ത്തി. 

തിരൂർക്കാട് ഐടിസിക്ക് സമീപം ശനിയാഴ്ച വൈകീട്ട് ആറുമണിയോടെയാണ് കെഎസ്ആർടിസി ബസും കാലികളെ കയറ്റി വരികയായിരുന്ന മിനിലോറിയും കൂട്ടിയിടിച്ചത്. അപകടത്തിൽ ബസിലുണ്ടായിരുന്ന യാത്രക്കാരും ലോറിയിലുണ്ടായിരുന്നവരും ഉൾപ്പെടെ 21 പേർക്ക് പരിക്കേറ്റിരുന്നു. റോഡിലേക്ക് തെറിച്ചുവീണ ഒരു പശുവും ഈ അപകടത്തിൽ ചത്തിരുന്നു. കോഴിക്കോട്ടുനിന്ന് പാലക്കാട്ടേക്ക് പോവുകയായിരുന്ന കെഎസ്ആർടിസി ബസാണ് അപകടത്തിൽപ്പെട്ടത്.

Two students died in a tragic accident in Tirurkkad, Malappuram. The accident occurred when a KSRTC bus collided with a lorry. 21 people were injured in the accident.

 #TirurkkadAccident, #KeralaAccident, #RoadAccident, #Malappuram, #Tragedy, #StudentsDeath