മുംബൈ: (KVARTHA) മഹാരാഷ്ട്രയിലെ രാഷ്ട്രീയം പുതിയ വഴിത്തിരിവുകളിലേക്ക് നീങ്ങുകയാണ്. സംസ്ഥാനത്തെ ഭരണകക്ഷിയായ മഹായുതി സർക്കാരിന് വെല്ലുവിളി ഉയർത്തി കോൺഗ്രസ് നേതാവ് നാനാ പട്ടോലെ രംഗത്തെത്തി. മുഖ്യമന്ത്രി ഏക്‌നാഥ് ഷിൻഡെയെയും ഉപമുഖ്യമന്ത്രി അജിത് പവാറിനെയും കോൺഗ്രസുമായി കൈകോർക്കാൻ അദ്ദേഹം പരസ്യമായി ക്ഷണിച്ചു. ഇരുവർക്കും തുല്യ അവസരം നൽകുന്നതിനായി റൊട്ടേഷണൽ അടിസ്ഥാനത്തിൽ മുഖ്യമന്ത്രി സ്ഥാനം പങ്കിടാമെന്ന വാഗ്ദാനവും പട്ടോലെ മുന്നോട്ട് വെച്ചത് രാഷ്ട്രീയ നിരീക്ഷകരെ പോലും അമ്പരപ്പിച്ചിരിക്കുകയാണ്. 

മഹായുതി സർക്കാരിൽ ഷിൻഡെയും പവാറും ശ്വാസംമുട്ടുകയാണെന്നും അവരുടെ ഇപ്പോഴത്തെ സഖ്യത്തിൽ അവർക്ക് അസ്വസ്ഥതയുണ്ടെന്നും പട്ടോലെ ആരോപിച്ചു. ഈ സാഹചര്യത്തിൽ കോൺഗ്രസ് ഇരുവർക്കും പിന്തുണ നൽകാൻ തയ്യാറാണെന്നും അദ്ദേഹം വ്യക്തമാക്കി. മുഖ്യമന്ത്രി സ്ഥാനത്തെ ചൊല്ലിയുള്ള തർക്കങ്ങൾക്കിടയിൽ ഈ നിർദ്ദേശം ഇരുവർക്കും ഒരു സാധ്യതയായിരിക്കുമെന്നും പട്ടോലെ കൂട്ടിച്ചേർത്തു.

നാനാ പട്ടോലെയുടെ ഈ പ്രസ്താവനയ്ക്ക് ശക്തമായ മറുപടിയുമായി മഹായുതിയിലെ പ്രധാന നേതാക്കൾ ഉടൻ തന്നെ രംഗത്തെത്തി. ബിജെപി നേതാവ് ചന്ദ്രശേഖർ ബാവൻകുലെ നാനാ പട്ടോലെയെ മഹായുതി  സർക്കാരിൽ ചേരാൻ ക്ഷണിക്കുകയും ചെയ്തു. ഇരുപക്ഷവും പരസ്പരം ക്ഷണിച്ചുകൊണ്ടുള്ള ഈ രാഷ്ട്രീയ നീക്കങ്ങൾ മഹാരാഷ്ട്ര രാഷ്ട്രീയത്തിൽ പുതിയ സമവാക്യങ്ങൾക്ക് രൂപം നൽകുമോ എന്ന് ഉറ്റുനോക്കുകയാണ് രാഷ്ട്രീയ ലോകം.

അതിനിടെ, ശിവസേന (യുബിടി) നേതാവും എംപിയുമായ സഞ്ജയ് റാവുത്ത് ഈ വിഷയത്തിൽ കൂടുതൽ വിവാദപരമായ വെളിപ്പെടുത്തലുകൾ നടത്തി. ഏക്‌നാഥ് ഷിൻഡെ നേരത്തെ കോൺഗ്രസിൽ ചേരാൻ ശ്രമിച്ചിരുന്നുവെന്ന് റാവുത്ത് പറഞ്ഞു. ഇതിനായി അദ്ദേഹം അന്നത്തെ പ്രമുഖ കോൺഗ്രസ് നേതാവായിരുന്ന അഹമ്മദ് പട്ടേലുമായി രഹസ്യ ചർച്ചകൾ നടത്തിയിരുന്നുവെന്നും റാവുത്ത് മാധ്യമങ്ങളോട് പറഞ്ഞു. അന്നത്തെ കോൺഗ്രസ് നേതാക്കളായ പ്രതിരാജ് ചവാനുമായി ഇക്കാര്യം സംസാരിക്കാവുന്നതാണ്. പുലർച്ചെ അഹമ്മദ് പട്ടേലുമായി ഷിൻഡെ നടത്തിയ ചർച്ചകളെക്കുറിച്ച് തനിക്ക് വ്യക്തമായ വിവരമുണ്ടെന്നും റാവുത്ത് കൂട്ടിച്ചേർത്തു.

Maharashtra politics takes a turn as Congress leader Nana Patole publicly invites Chief Minister Eknath Shinde and Deputy Chief Minister Ajit Pawar to join hands with the Congress, offering a rotational chief ministership. Patole claims Shinde and Pawar are uneasy in the Mahayuti government. BJP leader Chandrashekhar Bawankule retaliated by inviting Patole to join Mahayuti. Meanwhile, Sanjay Raut of Shiv Sena (UBT) revealed that Shinde had previously attempted to join the Congress.

#MaharashtraPolitics, #NanaPatole, #EknathShinde, #AjitPawar, #Congress, #Mahayuti