കണ്ണൂർ: (KVARTHA) സി.എം.ആർ.എൽ - എക്സാലോജിക് കരാർ വിഷയത്തിൽ മാത്യു കുഴൽനാടൻ്റെ ഹർജി ഹൈക്കോടതി തള്ളിയ സംഭവത്തിൽ സി.പി.ഐ.എം കേന്ദ്ര കമ്മിറ്റിയംഗം ഇ.പി. ജയരാജൻ ശക്തമായ പ്രതികരണവുമായി രംഗത്തെത്തി. മുഖ്യമന്ത്രിയോടും മകളോടും ജനങ്ങളോടും മാത്യു കുഴൽനാടൻ മാപ്പ് പറയണമെന്ന് ഇ.പി. ജയരാജൻ ആവശ്യപ്പെട്ടു. കോപ്പിയടിച്ച് പരീക്ഷ ജയിക്കുന്നത് പോലെയല്ല കോടതിയിൽ വാദിച്ചു ജയിക്കുന്നതെന്നും അദ്ദേഹം മാത്യു കുഴൽനാടനെ ഓർമ്മിപ്പിച്ചു. കുഴൽനാടനെ കോടതി ശല്യക്കാരനായ വ്യവഹാരിയായി പ്രഖ്യാപിക്കണമെന്നും അദ്ദേഹം പറഞ്ഞു. കുഴൽനാടൻ്റെ വൃത്തികെട്ട ആരോപണത്തിന് പിന്നിൽ പ്രതിപക്ഷ നേതാവായ വി.ഡി. സതീശനാണെന്നും അദ്ദേഹം ആരോപിച്ചു.

കരിമണൽ കമ്പനിയായ സി.എം.ആർ.എല്ലിൽ നിന്നും മുഖ്യമന്ത്രിയും മകളും വിവിധ രാഷ്ട്രീയ നേതാക്കളും പണം വാങ്ങിയെന്ന ആരോപണത്തിൽ വിജിലൻസ് അന്വേഷണം ആവശ്യപ്പെട്ടുള്ള മാത്യു കുഴൽനാടൻ എം.എൽ.എയുടെ ഹർജിയാണ് ഹൈക്കോടതി തള്ളിയത്. സി.എം.ആർ.എല്ലിൽ നിന്ന് മുഖ്യമന്ത്രിയുടെ മകൾ വീണയുടെ കമ്പനി 1.72 കോടി രൂപ കൈപ്പറ്റിയത് അഴിമതി നിരോധന നിയമപ്രകാരം അന്വേഷിക്കണമെന്നായിരുന്നു മാത്യു കുഴൽനാടൻ്റെ ആവശ്യം. ഹർജി തിരുവനന്തപുരം വിജിലൻസ് കോടതിയും നേരത്തെ തള്ളിയിരുന്നു.

അഴിമതി നിരോധന നിയമപ്രകാരം അന്വേഷിക്കേണ്ട കുറ്റകൃത്യം ഹർജിയിലോ നൽകിയ രേഖകളിലോ കണ്ടെത്താനായില്ലെന്നായിരുന്നു കോടതി നിരീക്ഷണം. തുടർന്ന് മാത്യു സമർപ്പിച്ച പുനഃപരിശോധന ഹർജിയാണ് ജസ്റ്റിസ് കെ. ബാബുവിൻ്റെ ബെഞ്ച് തള്ളിയത്. അതേസമയം, ഹർജി രാഷ്ട്രീയ പ്രേരിതമാണെന്ന തിരുവനന്തപുരം വിജിലൻസ് കോടതിയുടെ പരാമർശം അനാവശ്യമെന്ന് ചൂണ്ടിക്കാട്ടി ഹൈക്കോടതി റദ്ദാക്കി.

സംശയം തോന്നിക്കുന്ന രേഖകൾ മാത്രമാണ് മാത്യു കുഴൽനാടൻ നൽകിയത്. സംശയത്തിന്റെ പുറത്ത് പൊതുപ്രവർത്തകർക്കെതിരെ അന്വേഷണം നടത്താനാവില്ല. ഇത് പൊതുപ്രവർത്തകരെ കളങ്കപ്പെടുത്തുന്നതിന് കാരണമാകും. പൊതുപ്രവർത്തകരെ പ്രതിയാക്കി വിളിച്ചുവരുത്തുന്ന നടപടി ഗൗരവതരമാണെന്നും ഇത് പൊതുപ്രവർത്തകരുടെ അന്തസിനെയും മാന്യതയെയും കളങ്കപ്പെടുത്തുമെന്നും ഹൈക്കോടതി ചൂണ്ടിക്കാട്ടി. കേസിൽ വസ്തുതകൾ ബോധ്യപ്പെടുത്താൻ മാത്യു കുഴൽനാടന് കഴിഞ്ഞില്ലെന്നും ഹൈക്കോടതി നിരീക്ഷിച്ചു. എല്ലാവരുമായി ആലോചിച്ച് തുടർ നിയമനടപടി സ്വീകരിക്കുമെന്ന് മാത്യു കുഴൽനാടൻ പ്രതികരിച്ചു. ഇതിനിടെ സി.എം.ആർ.എൽ ഉദ്യോഗസ്ഥരുടെ ഡയറി തെളിവായി സ്വീകരിക്കാനാവില്ലെന്ന് ഹൈക്കോടതി വ്യക്തമാക്കി. മാസപ്പടി വിവരങ്ങൾ തെളിവായി സ്വീകരിക്കാൻ കഴിയില്ലെന്നും പ്രഥമദൃഷ്ട്യാ തെളിവല്ലാത്ത രേഖകൾ കോടതിക്ക് കേസെടുക്കാനുള്ള തെളിവായി സ്വീകരിക്കാനാവില്ലെന്നും കോടതി ചൂണ്ടിക്കാട്ടി. വിശ്വാസ്യതയുള്ള രേഖകളുടെ അഭാവത്തിൽ മാസപ്പടി രേഖകൾ പരിഗണിക്കാനാവില്ലെന്നതാണ് കോടതി നിലപാട്.

CPI(M) Central Committee member E.P. Jayarajan strongly reacted to the High Court dismissing Mathew Kuzhalnadan's petition in the CMRL-Exalogic contract issue. He demanded an apology from Kuzhalnadan to the CM, his daughter, and the public, stating that winning in court is not like passing exams by copying and called for him to be declared a nuisance litigant.

#EPJayarajan #MathewKuzhalnadan #KeralaHighCourt #CMRL #Exalogic #CPM