Controversy | വഖഫ് നിയമഭേദഗതി ദുരുദ്ദേശ്യപരമാണോ? അനുകൂലിക്കുന്നവർക്കും എതിർക്കുന്നവർക്കും പറയാനുള്ളത്
ആദിത്യൻ ആറന്മുള
(KVARTHA) മൂന്നാം നരേന്ദ്ര മോദി സര്‍ക്കാര്‍ അവതരിപ്പിച്ച വഖഫ് നിയമഭേദഗതി വലിയ വിവാദമായിരിക്കുകയാണ്. പ്രതിപക്ഷവും മുസ്ലിം സംഘടനകളും ഒന്നടങ്കം ഇതിനെതിരെ രംഗത്ത് വന്നതോടെ സര്‍ക്കാര്‍ ബില്‍ സംയുക്ത പാര്‍ലമെന്ററി സമിതിക്ക് വിട്ടു. മതസ്വാതന്ത്ര്യത്തിനും മതപരമായ കാര്യങ്ങള്‍ കൈകാര്യം ചെയ്യാനുള്ള സ്വാതന്ത്ര്യത്തിനും ഉള്ള അവകാശം ലംഘിക്കുന്ന ഭേദഗതിയാണ് കേന്ദ്രം കൊണ്ടുവന്നതെന്ന് ചൂണ്ടിക്കാട്ടി ഇന്ത്യ സഖ്യം ബില്ലിനെ ശക്തമായി എതിര്‍ത്തു.
വഖഫ് (ഭേദഗതി) ബില്ലിലെ 2024 ലെ 44 ഭേദഗതികള്‍, വഖഫ് ബോര്‍ഡുകളുടെ അധികാരം നിയന്ത്രിക്കാനും സര്‍ക്കാരിന് കൂടുതല്‍ നിയന്ത്രണം അനുവദിക്കാനും അമുസ്ലിംകളെ ബോര്‍ഡുകളില്‍ അംഗങ്ങളാക്കാനും സ്വത്തുക്കള്‍ ദാനം ചെയ്യുന്നത് നിയന്ത്രിക്കാനും വഖ്ഫ് ട്രൈബ്യൂണലുകളുടെ വര്‍ത്തനം എങ്ങനെ മാറ്റണമെന്നും നിര്‍ദ്ദേശിക്കുന്നു. വഖഫ് ബോര്‍ഡുകളുടെ സ്വയംഭരണാധികാരം കുറയ്ക്കുന്ന ബില്‍ മുസ്ലിം സമൂഹവുമായി കൂടിയാലോചിക്കാതെയാണ് തയ്യാറാക്കിയതെന്നും നിരവധി മുസ്ലിം സംഘടനകള്‍ വിമര്‍ശിച്ചു.
വഖഫ് ബോര്‍ഡില്‍ ചിലര്‍ നിര്‍ദിഷ്ട മാറ്റങ്ങള്‍, പരിഷ്‌കാരങ്ങള്‍ കൊണ്ടുവരുമെന്നാണ് വിശ്വസിച്ചത്. എന്നാല്‍ ബില്‍ സമുദായത്തിന്റെ മതപരമായ അവകാശങ്ങളെ ഹനിക്കുമെന്നും മുസ്ലീം സ്വത്തുക്കള്‍ തര്‍ക്കങ്ങള്‍ക്ക് ഇരയാകുമെന്നും പലരും ചൂണ്ടിക്കാട്ടുന്നു. സര്‍ക്കാര്‍ അവകാശവാദങ്ങള്‍ക്ക് വിരുദ്ധമായി, ബില്‍ വഖഫ് ബോര്‍ഡുകളിലെ ലിംഗ പ്രാതിനിധ്യം വര്‍ദ്ധിപ്പിക്കുന്നില്ലെന്നും അവര്‍ ചൂണ്ടിക്കാട്ടി. മതപരമായ കാരണങ്ങളാല്‍ പൗരന്മാര്‍ (കൂടുതലും മുസ്ലിംകള്‍) നടത്തുന്ന ജീവകാരുണ്യ പ്രവര്‍ത്തനങ്ങള്‍ക്ക് വഖഫ് ബോര്‍ഡ് മേല്‍നോട്ടം വഹിക്കണം. ഇന്ത്യയില്‍ 30 വഖഫ് ബോര്‍ഡുകളുണ്ട്, അവ ഓരോന്നും ഒരു സംസ്ഥാനത്തിനോ ഒരു കേന്ദ്രഭരണ പ്രദേശത്തിനോ വേണ്ടി സ്ഥാപിച്ചതാണ്. രാജ്യത്തുടനീളമുള്ള ഏകദേശം ഒമ്പത് ലക്ഷം സ്വത്തുക്കള്‍ ഇവര്‍ നിയന്ത്രിക്കുന്നു.
ജില്ലാ കളക്ടറുടെ ഓഫീസിനും അതുവഴി സര്‍ക്കാരിനും ബോര്‍ഡുകളുടെ മേല്‍ കൂടുതല്‍ അധികാരം നല്‍കാന്‍ പുതിയ ബില്‍ നിര്‍ദ്ദേശിക്കുന്നു. ഉദാഹരണത്തിന്, സര്‍ക്കാരും വഖഫ് ബോര്‍ഡും തമ്മിലുള്ള തര്‍ക്കങ്ങളില്‍ കലക്ടറെ മധ്യസ്ഥനായി ചുമതലപ്പെടുത്തുന്നു. വഖഫ് സ്വത്ത് യഥാര്‍ത്ഥത്തില്‍ സര്‍ക്കാരിന്റേതാണെന്ന് സര്‍ക്കാര്‍ സംശയിക്കുന്നുവെങ്കില്‍, കളക്ടര്‍ - ഒരു ജില്ലാ മജിസ്ട്രേറ്റോ ഡിവിഷണല്‍ കമ്മീഷണറോ - വിഷയം അന്വേഷിച്ച് സംസ്ഥാന സര്‍ക്കാരിന് റിപ്പോര്‍ട്ട് സമര്‍പ്പിക്കും. 'ഈ നിയമം നടപ്പാക്കുന്നതിന് മുമ്പോ ശേഷമോ തിരിച്ചറിയുകയോ വഖ്ഫ് സ്വത്തായി പ്രഖ്യാപിക്കുകയോ ചെയ്ത ഏതെങ്കിലും സര്‍ക്കാര്‍ സ്വത്ത് വഖ്ഫ് സ്വത്തായി കണക്കാക്കില്ല', എന്ന് ഭേദഗതി വരുത്താന്‍ പുതിയ ഭേഗദതി ബില്‍ നിര്‍ദ്ദേശിക്കുന്നു.
കളക്ടറുടെ അന്വേഷണത്തില്‍ വസ്തു വഖഫ് സ്വത്തല്ലെന്ന് തെളിഞ്ഞാല്‍ റവന്യൂ രേഖകളില്‍ കളക്ടര്‍ സ്വത്തിന്റെ ഉടമസ്ഥാവകാശം മാറ്റും. മുസ്ലീം സ്വത്തുക്കളും ആരാധനാലയങ്ങളും കൈക്കലാക്കാന്‍ ഈ വ്യവസ്ഥ ദുരുപയോഗം ചെയ്യുമെന്ന് ഭയമുണ്ടെന്ന് ഡല്‍ഹി വഖഫ് ബോര്‍ഡിന്റെ മുന്‍ അഭിഭാഷകന്‍ വജീഹ് ഷഫീഖ് പറഞ്ഞു. മസ്ജിദുകളും ദര്‍ഗകളും ഖബറിടങ്ങളും ഉള്‍പ്പെടെ ദേശീയ തലസ്ഥാനത്തെ 123 സ്വത്തുക്കളുടെ കാര്യത്തില്‍ കേന്ദ്രവും ഡല്‍ഹി വഖഫ് ബോര്‍ഡും തമ്മിലുള്ള നിയമ തര്‍ക്കം അദ്ദേഹം ചൂണ്ടിക്കാണിച്ചു. കഴിഞ്ഞ ഫെബ്രുവരിയില്‍, കേന്ദ്ര നഗരകാര്യ മന്ത്രാലയം 123 സ്വത്തുക്കള്‍ ഏറ്റെടുക്കാനുള്ള തീരുമാനം പ്രഖ്യാപിച്ചിരുന്നു, രണ്ടംഗ കമ്മീഷന്റെ ഉത്തരവിന് ശേഷം ഡല്‍ഹി വഖഫ് ബോര്‍ഡിനെ അവയുമായി ബന്ധപ്പെട്ട എല്ലാ കാര്യങ്ങളില്‍ നിന്നും 'ഒഴിവാക്കുന്നു' എന്നും പറഞ്ഞു. വിഷയം ഇപ്പോള്‍ ഡല്‍ഹി ഹൈക്കോടതിയുടെ പരിഗണനയിലാണ്.
വഖഫ് സ്വത്തുക്കള്‍ ഏറ്റെടുക്കുന്നതിനാണ് ഭേദഗതി വരുത്തിയതെന്നും ഷഫീഖ് പറഞ്ഞു. മുസ്ലീം മതകേന്ദ്രങ്ങള്‍ ഹിന്ദുത്വ ഗ്രൂപ്പുകള്‍ ലക്ഷ്യമിടുന്നതിന്റെ അപകടസാധ്യതയും ഭേദഗതിയിലുണ്ടെന്നും ഈ കെട്ടിടങ്ങള്‍ സര്‍ക്കാര്‍ ഭൂമിയിലാണെന്ന് അവകാശപ്പെടുകയും തര്‍ക്ക സ്ഥലങ്ങളായി പ്രഖ്യാപിക്കുകയും ചെയ്‌തേക്കാമെന്നും അദ്ദേഹം ആരോപിച്ചു. മുന്‍ ഭരണകാലത്ത് വഖഫ് ബോര്‍ഡ് വഖഫ് ആയി രജിസ്റ്റര്‍ ചെയ്യുന്നതിനുള്ള അപേക്ഷകള്‍ സ്വീകരിക്കുകയും സൂക്ഷ്മപരിശോധന നടത്തുകയും ചെയ്യേണ്ടിയിരുന്നു. ബോര്‍ഡ് അപേക്ഷ കളക്ടര്‍ക്ക് കൈമാറുമെന്ന് നിര്‍ദ്ദിഷ്ട ഭേദഗതി പറയുന്നു, അവര്‍ അപേക്ഷയുടെ സാധുതയും അതിലെ ഏതെങ്കിലും വിശദാംശങ്ങളുടെ വസ്തുതയും അന്വേഷിച്ച് ബോര്‍ഡിന് റിപ്പോര്‍ട്ട് സമര്‍പ്പിക്കും. ഈ റിപ്പോര്‍ട്ട് വഖഫ് പൂര്‍ണ്ണമായോ ഭാഗികമായോ, തര്‍ക്കത്തിലാണെന്നോ സര്‍ക്കാര്‍ വസ്തുവാണെന്നോ' കണ്ടെത്തുകയാണെങ്കില്‍, തര്‍ക്കത്തില്‍ കോടതി കോടതി തീരുമാനം ഉണ്ടാകണം, അത് വരെ വഖഫ് സ്വത്തായി രജിസ്റ്റര്‍ ചെയ്യില്ല.
വഖഫ് ബോര്‍ഡുകള്‍ക്ക് തുരങ്കം വയ്ക്കാനും വഖഫ് സ്വത്തുക്കള്‍ സംബന്ധിച്ച് തര്‍ക്കങ്ങള്‍ സൃഷ്ടിക്കാനും ഭേദഗതികള്‍ സര്‍ക്കാരിനെ സഹായിക്കുമെന്ന് ഓള്‍ ഇന്ത്യ മുസ്ലിം പേഴ്സണല്‍ ലോ ബോര്‍ഡിന്റെ വക്താവ് എസ്‌ക്യുആര്‍ ഇല്യാസ് പറഞ്ഞു. 'നിര്‍ദിഷ്ട മാറ്റങ്ങള്‍ വഖഫ് സ്വത്തുക്കള്‍ നഷ്ടപ്പെടാന്‍ ഇടയാക്കും, കാരണം ബ്യൂറോക്രാറ്റുകള്‍ സര്‍ക്കാരിന്റെ ഇഷ്ടത്തിനനുസരിച്ചാണ് കാര്യങ്ങള്‍ തീരുമാനിക്കുകയെന്നും ചൂണ്ടിക്കാട്ടി.
ഉത്തരാഖണ്ഡ് വഖഫ് ബോര്‍ഡ് ചെയര്‍മാനും ബിജെപി നേതാവുമായ ഷദാബ് ഷംസ്, 'വഖഫ് ബോര്‍ഡുകളെ സര്‍ക്കാരുമായി അടുപ്പിക്കുന്നതിനാണ് ഭേദഗതിയെന്ന് വാദിച്ചു. വഖഫ് ബോര്‍ഡുകളും സര്‍ക്കാര്‍ അധികാരികളും തമ്മില്‍ തര്‍ക്കമുണ്ട്, പല ഉദ്യോഗസ്ഥരും വഖഫ് ഉത്തരവുകള്‍ അവഗണിക്കുന്നു. വഖഫ് സ്വത്തുക്കള്‍ സംബന്ധിച്ച തര്‍ക്കങ്ങള്‍ പരിഹരിക്കാന്‍ ജില്ലാ ഭരണകൂടം ഉദ്യോഗസ്ഥര്‍ക്ക് അധികാരം നല്‍കുന്നതില്‍ തെറ്റില്ല. ഞങ്ങള്‍ക്ക് സ്വതന്ത്രമായി പ്രവര്‍ത്തിക്കാന്‍ കഴിയില്ല, സര്‍ക്കാരിന്റെ നയങ്ങളുമായി ചേര്‍ന്ന് പ്രവര്‍ത്തിക്കുന്നതാണ് നല്ലതെന്നും അദ്ദേഹം പറഞ്ഞു.
14 വര്‍ഷം മുമ്പ് മധ്യപ്രദേശ് വഖഫ് ബോര്‍ഡിന്റെ ചീഫ് എക്‌സിക്യൂട്ടീവ് ഓഫീസറായി സേവനമനുഷ്ഠിച്ച സ്വതന്ത്ര വഖ്ഫ് കണ്‍സള്‍ട്ടന്റായ എസ്എംഎച്ച് സെയ്ദിയും ഈ ഭേദഗതികളെ അനുകൂലമായി കാണുന്നു. അപേക്ഷ കലക്ടര്‍ക്ക് കൈമാറുന്നതിലൂടെ, ബില്‍ ഗുരുതരമായ ഒരു പ്രശ്‌നം പരിശോധിക്കും, ഒരാള്‍ക്ക് മറ്റൊരാളുടെ സ്വത്ത് വഖഫായി രജിസ്റ്റര്‍ ചെയ്യാന്‍ കഴിയില്ല, അദ്ദേഹം പറഞ്ഞു. സെക്ഷന്‍ 3 ഭേദഗതി പല ശ്മശാനങ്ങളും ഇപ്പോള്‍ സര്‍ക്കാരിന്റെ നിയന്ത്രണത്തിലാക്കുമെന്ന് ഉറപ്പാക്കുമെന്നും സെയ്ദി കൂട്ടിച്ചേര്‍ത്തു.
രാജ്യത്തെ നഗരങ്ങളിലും ഗ്രാമങ്ങളിലും നിരവധി ഖബറിടങ്ങൾ പ്രാദേശിക ഭരണകൂടങ്ങള്‍ നല്‍കിയ ഭൂമിയിലാണ്. എന്നാല്‍ വഖഫ് ബോര്‍ഡ് പലപ്പോഴും ഈ വസ്തുവകകള്‍ നിയന്ത്രിക്കാന്‍ വരുന്നു, അതിലെ കയ്യേറ്റങ്ങള്‍ നിയന്ത്രിക്കുന്നില്ല. ഈ പ്രശ്‌നം മികച്ച രീതിയില്‍ കൈകാര്യം ചെയ്യാന്‍ സര്‍ക്കാരിന് കഴിയുമെന്നുമാണ് വാദം.
കേന്ദ്ര ന്യൂനപക്ഷ കാര്യ മന്ത്രാലയത്തിന്റെ വഖഫ് മാനേജ്മെന്റ് സിസ്റ്റം ഓഫ് ഇന്ത്യ പോര്‍ട്ടല്‍ പ്രകാരം, രാജ്യത്തെ വഖഫ് ബോര്‍ഡുകളില്‍ രജിസ്റ്റര്‍ ചെയ്തിട്ടുള്ള സ്ഥാവര സ്വത്തുക്കളില്‍ ഭൂരിഭാഗവും ഖബർസ്ഥാനാണ്, അവ ഒന്നര ലക്ഷത്തിലധികം വരും. രാജ്യത്തെ സ്ഥാവര വഖഫുകളുടെ ഏകദേശം 7% കയ്യേറ്റമാണെന്നും പോര്‍ട്ടല്‍ പറയുന്നു.
എന്നാല്‍ സിവില്‍ അഭിഭാഷകനും എ ട്രീറ്റീസ് ഓണ്‍ വഖഫ് ലോസ് ഇന്‍ ഇന്ത്യ എന്ന ഗ്രന്ഥത്തിന്റെ രചയിതാവുമായ അജിത് സിംഗ് സോധി, വഖഫ് ബോര്‍ഡുകളുടെ കാര്യങ്ങളില്‍ കൂടുതല്‍ സര്‍ക്കാര്‍ നിയന്ത്രണത്തിന്റെ നേട്ടങ്ങളെക്കുറിച്ച് സംശയം പ്രകടിപ്പിച്ചു. സര്‍ക്കാര്‍ വരുന്നിടത്തെല്ലാം, പ്രത്യേകിച്ച് ജില്ലാ മജിസ്ട്രേറ്റുകളെപ്പോലുള്ള ഉദ്യോഗസ്ഥര്‍ കാര്യങ്ങള്‍ സര്‍ക്കാരിന് അനുകൂലമാക്കും. വഖഫ് ബോര്‍ഡുകള്‍ക്ക് മാത്രമല്ല സര്‍ക്കാര്‍ ഉദ്യോഗസ്ഥരും അഴിമതി നടത്തുമെന്നും അദ്ദേഹം ചൂണ്ടിക്കാണിച്ചു. വഖഫ് നിയമത്തിലെ ഏറ്റവും വിവാദപരമായ വകുപ്പുകളിലൊന്നാണ്, ഒരു സ്വത്ത് വഖഫ് സ്വത്താണോ അല്ലയോ എന്ന് തീരുമാനിക്കാന്‍ ബോര്‍ഡിനെ അനുവദിക്കുന്ന സെക്ഷന്‍ 40 ആണ്.
വഖഫ്, ട്രിബ്യൂണല്‍ റദ്ദാക്കിയില്ലെങ്കില്‍ ഈ തീരുമാനം അന്തിമമാണ്. ഭേദഗതി ബില്ലില്‍ ഈ വകുപ്പ് പൂര്‍ണ്ണമായും ഇല്ലാതാക്കാന്‍ നിര്‍ദ്ദേശിക്കുന്നു. വഖഫ് ബോര്‍ഡിന് ഇഷ്ടപ്പെട്ടാല്‍ എവിടെയും ഏത് ഭൂമിയും സ്വമേധയാ ഏറ്റെടുക്കാന്‍ ഇത് അനുവദിക്കുന്നു എന്നാണ് നിലവിലുള്ള നിയമത്തെ വിമര്‍ശിക്കുന്നവര്‍ പറയുന്നത്. എന്നാല്‍ ഡല്‍ഹി വഖഫ് ബോര്‍ഡിന്റെ മുന്‍ അഭിഭാഷകന്‍ ഷഫീഖ് ഈ വ്യാഖ്യാനം നിഷേധിച്ചു. 'വഖഫ് ബോര്‍ഡുകള്‍ സ്വത്തുക്കള്‍ വ്യാപകമായ രീതിയില്‍ ഏറ്റെടുത്തിട്ടുണ്ടോ എന്ന് കണ്ടെത്താന്‍ സര്‍ക്കാര്‍ അന്വേഷണം നടത്തണം. എന്റെ അറിവില്‍, സ്വതവേ വഖഫ് സ്വത്തുക്കളായ പള്ളികളും ആരാധനാലയങ്ങളും ഒഴികെ ഡല്‍ഹി വഖഫ് ബോര്‍ഡ് സെക്ഷന്‍ 40 പ്രകാരം ഒരു സ്വത്തും വഖഫ് ആയി പ്രഖ്യാപിച്ചിട്ടില്ല. വഖഫ് ബോര്‍ഡുകള്‍ വഖഫ് ആയി പ്രഖ്യാപിക്കുന്നതിനുള്ള കാരണങ്ങള്‍ രേഖപ്പെടുത്തണമെന്നും ഏകപക്ഷീയമായ പ്രഖ്യാപനങ്ങള്‍ അനുവദനീയമല്ലെന്നും വര്‍ഷങ്ങളായി കോടതി വിധികള്‍ വ്യക്തമാക്കിയിട്ടുണ്ടെന്നും ഷഫീഖ് കൂട്ടിച്ചേര്‍ത്തു.
വഖഫ് ബോര്‍ഡില്‍ രജിസ്റ്റര്‍ ചെയ്തിട്ടുള്ള സ്വത്തുക്കളുടെ തര്‍ക്കങ്ങള്‍ക്ക് മാത്രമാണ് സെക്ഷന്‍ 40 ബാധകമെന്നു ഒസ്മാനിയ യൂണിവേഴ്സിറ്റിയിലെ മുന്‍ ഡീനും കമന്ററി ഓണ്‍ ദി ലോ ഓഫ് വഖഫ് ഇന്‍ ഇന്‍ഡ്യയുടെ രചയിതാവുമായ അഹമ്മദുല്ല ഖാന്‍ പറഞ്ഞു. പഞ്ചാബിലും ചണ്ഡീഗഡിലും പ്രാക്ടീസ് ചെയ്യുന്ന സോധി, രണ്ട് പതിറ്റാണ്ട് നീണ്ട തന്റെ കരിയറില്‍, പഞ്ചാബ് വഖഫ് ബോര്‍ഡ് ഏകപക്ഷീയമായി ഒരു സ്വത്ത് കൈക്കലാക്കിയ കേസൊന്നും താന്‍ കണ്ടിട്ടില്ലെന്ന് പറഞ്ഞു. '40-ാം വകുപ്പ് വഖഫ് ബോര്‍ഡിന് അധികാരം നല്‍കുന്നു, എന്നാല്‍ ട്രിബ്യൂണലാണ് അന്തിമ വിധി പ്രഖ്യാപിക്കുന്നതെന്നും അദ്ദേഹം ചൂണ്ടിക്കാട്ടി.
