തിരുവനന്തപുരം: (KVARTHA) കൊടകര കുഴൽപ്പണക്കേസിൽ ബി.ജെ.പി നേതാക്കൾക്ക് ഇ.ഡി ക്ലീൻചിറ്റ് നൽകിയതോടെ, ഇ.ഡിക്കെതിരെ രൂക്ഷ വിമർശനവുമായി സി.പി.എം രംഗത്ത്. ഇ.ഡി ബി.ജെ.പിയുടെ ദാസ്യവേല ചെയ്യുകയാണെന്നും ഈ മാസം 29-ന് കൊച്ചിയിലെ ഇ.ഡി ആസ്ഥാനത്തേക്ക് സി.പി.എം പ്രതിഷേധ മാർച്ച് നടത്തുമെന്നും സി.പി.എം സംസ്ഥാന സെക്രട്ടറി എം.വി. ഗോവിന്ദൻ പ്രഖ്യാപിച്ചു. സി.പി.എം-ബി.ജെ.പി ഡീൽ എന്ന ആരോപണവുമായി പ്രതിപക്ഷ നേതാവ് വി.ഡി. സതീശൻ ഉൾപ്പെടെയുള്ള കോൺഗ്രസ് നേതാക്കളും രംഗത്തെത്തി.

സി.പി.എം നിലപാട്:

കൊടകരയിലേത് കുഴൽപ്പണമാണെന്ന നിലപാടിൽ സി.പി.എം ഉറച്ചുനിൽക്കുന്നു. പണത്തിൻ്റെ ഉറവിടം കണ്ടെത്താത്ത ഇ.ഡി പച്ചയായ രാഷ്ട്രീയം കളിക്കുകയാണെന്നും എം.വി. ഗോവിന്ദൻ ആരോപിച്ചു. ഇ.ഡിക്കെതിരെ സി.പി.എം സമരത്തിലേക്ക് നീങ്ങുമ്പോൾ, കരുവന്നൂർ കേസിൽ സി.പി.എമ്മിനെ ഇ.ഡി സഹായിച്ചേക്കാമെന്ന് വി.ഡി. സതീശൻ തുറന്നടിച്ചു. സോണിയയെയും രാഹുലിനെയും മണിക്കൂറുകളോളം ചോദ്യംചെയ്ത ഇ.ഡി, പിണറായിയെയും കെ. സുരേന്ദ്രനെയും തൊടില്ലെന്ന് ഷാഫി പറമ്പിൽ ആരോപിച്ചു. ഷാഫി പറമ്പിലിനെ സംരക്ഷിക്കാൻ ഇ.ഡിക്ക് വി.ഡി. സതീശൻ സംരക്ഷണം ഒരുക്കുകയാണെന്നും എം.വി. ഗോവിന്ദൻ ആരോപിച്ചു.

കൊടകര കുഴൽപ്പണക്കേസ്: ഒരു അവലോകനം:

2021-ലെ നിയമസഭാ തിരഞ്ഞെടുപ്പിന് മൂന്ന് ദിവസം മുൻപ്, ഏപ്രിൽ മൂന്നിന് പുലർച്ചെ ദേശീയപാതയിലൂടെ പോയ കാർ ആക്രമിച്ചു ക്രിമിനൽ സംഘം മൂന്നരക്കോടി രൂപ കവർന്നതാണ് കൊടകര കുഴൽപ്പണക്കേസ്. ഏപ്രിൽ ഏഴിനാണ് പൊലീസ് പരാതി ലഭിച്ചത്. 25 ലക്ഷം രൂപ നഷ്ടമായെന്നായിരുന്നു ഡ്രൈവർ ഷംജീറിൻ്റെ പരാതി. കാറിൽ മൂന്നരക്കോടി രൂപയുണ്ടായിരുന്നെന്നും ബി.ജെ.പി സ്ഥാനാർത്ഥികളുടെ പ്രചാരണത്തിന് വേണ്ടി എത്തിച്ചതാണെന്നും പൊലീസ് കണ്ടെത്തി. 22 പേരെ പ്രതി ചേർത്ത് 2021 ജൂലൈ 23-ന് കുറ്റപത്രം സമർപ്പിച്ചു. ഒരാൾ കൂടി അറസ്റ്റിലായതിന് പിന്നാലെ 2022 നവംബർ 15-ന് അധികമായി ഒരു കുറ്റപത്രം കൂടി സമർപ്പിച്ചു.

• പൊലീസ് കുറ്റപത്രം: കൊള്ളയടിച്ചത് ബി.ജെ.പിക്കുള്ള തിരഞ്ഞെടുപ്പ് ഫണ്ട്.

• ധർമരാജൻ ബി.ജെ.പിയുടെ ഹവാല ഇടപാടുകാരൻ. പണം നഷ്ടപ്പെട്ടയുടൻ ധർമരാജൻ വിളിച്ചത് കെ. സുരേന്ദ്രനെയും എം. ഗണേശനെയും.

• തൃശൂരിൽ വെച്ച് 6.25 കോടി രൂപ ബി.ജെ.പി നേതാക്കൾക്ക് കൈമാറി, ബാക്കി 3.5 കോടിയിലേറെ രൂപയുമായി ആലപ്പുഴയിലേക്ക് പോകുന്ന വഴിയാണ് കവർച്ച നടന്നത്.

• സാക്ഷിപ്പട്ടികയിൽ കെ. സുരേന്ദ്രൻ ഉൾപ്പെടെ 19 ബി.ജെ.പി നേതാക്കൾ.

• ധർമരാജൻ യഥാർത്ഥത്തിൽ കടത്തിയത് 41.40 കോടി രൂപയുടെ കള്ളപ്പണം. ഇത് പല ജില്ലകളിലായി ബി.ജെ.പി ഓഫീസുകൾക്ക് വീതിച്ചു നൽകി.

• കൊടകരയ്ക്ക് മുൻപ് 2021 മാർച്ച് ആറിന് സേലത്ത് 4.40 കോടി രൂപ കൊള്ളയടിച്ചു. 2021 ഏപ്രിൽ മൂന്നിനാണ് കൊടകര കവർച്ച നടന്നത്.

ഇ.ഡി കുറ്റപത്രം:

• ട്രാവൻകൂർ പാലസ് ഹോട്ടൽ വക ആലപ്പുഴയിലുള്ള സ്ഥലം വാങ്ങാൻ ധർമരാജൻ കൊടുത്തുവിട്ട പണം.

• ധർമരാജൻ ബിസിനസുകാരൻ, ബി.ജെ.പി നേതൃത്വവുമായുള്ള ബന്ധത്തെ പറ്റി കുറ്റപത്രത്തിൽ പറയുന്നില്ല.

• വാഹനത്തിൽ കൊണ്ടുവന്നത് 3.50 കോടി രൂപ മാത്രം.

• ബി.ജെ.പി നേതാക്കളെ സാക്ഷികളാക്കിയിട്ടില്ല.

• ധർമരാജൻ യഥാർത്ഥത്തിൽ കടത്തിയ തുകയെക്കുറിച്ചും ബി.ജെ.പി ഓഫീസുകൾക്ക് വീതിച്ചു നൽകിയതിനെക്കുറിച്ചും ഇ.ഡി കുറ്റപത്രത്തിൽ പരാമർശമില്ല.

• കൊടകര കവർച്ച നടക്കുന്നതിനു മുൻപ് സേലത്ത് നടന്ന കവർച്ചയെക്കുറിച്ചും കുറ്റപത്രത്തിൽ ഒന്നും പറയുന്നില്ല.

കേസ് അന്വേഷിച്ച പ്രത്യേക സംഘത്തിൻ്റെ തലവനായിരുന്ന എ.സി.പി വി.കെ. രാജു 2021 ഓഗസ്റ്റ് രണ്ടിന് ഇ.ഡിയുടെ കൊച്ചിയിലെ ഡെപ്യൂട്ടി ഡയറക്ടർക്ക് കൊടുത്ത റിപ്പോർട്ടിൽ ബി.ജെ.പി സംസ്ഥാന അധ്യക്ഷനായിരുന്ന കെ. സുരേന്ദ്രന്റെയും സംഘടനാ സെക്രട്ടറി എം. ഗണേശിൻ്റെയും നിർദേശപ്രകാരം 41.40 കോടി രൂപ 2021 നിയമസഭാ തിരഞ്ഞെടുപ്പുമായി ബന്ധപ്പെട്ട് കർണാടകത്തിൽ നിന്ന് കേരളത്തിലേക്ക് കൊണ്ടുവന്നിരുന്നതായി വിശദമായ ചോദ്യം ചെയ്യലിൽ ധർമരാജൻ പറഞ്ഞിരുന്നതായി വ്യക്തമാക്കിയിട്ടുണ്ട്. ഇതൊന്നും ഇ.ഡി മുഖവിലക്കെടുക്കാതെയാണ് കുറ്റപത്രം നൽകിയിരിക്കുന്നത്.

പണത്തിൻ്റെ ഉറവിടം സംബന്ധിച്ച് നിയമപരമായ ഒരു രേഖകളും ഹാജരാക്കാൻ കഴിഞ്ഞില്ലെന്നും പൊലീസ് ചൂണ്ടിക്കാട്ടിയിരുന്നു. എന്നാൽ കൊടകരയിൽ കൊള്ളയടിക്കപ്പെട്ട 3.56 കോടിയുടെ ഉറവിടം സംബന്ധിച്ച് ധർമരാജൻ രേഖകൾ ഹാജരാക്കിയെന്നാണ് ഇ.ഡി പറയുന്നത്. ബി.ജെ.പി നേതാക്കൾക്ക് കുഴൽപണം സംബന്ധിച്ച് കൃത്യമായ അറിവുണ്ടായിരുന്നെന്ന് പൊലീസ് റിപ്പോർട്ടിൽ വ്യക്തമാക്കുമ്പോൾ നേതാക്കളെ സാക്ഷിയാക്കുക പോലും ഇ.ഡി ചെയ്തിട്ടില്ല.

രാഷ്ട്രീയ ആരോപണങ്ങൾ:

കൊടകരക്കേസിൽ ബി.ജെ.പി നേതാക്കളെ ഇ.ഡി സംരക്ഷിക്കുന്നെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു. ആർ.എസ്.എസിനും ബി.ജെ.പിക്കും വേണ്ടി എന്ത് വൃത്തികെട്ട നിലപാടും ഇ.ഡി സ്വീകരിക്കുന്നുവെന്നും സുരേന്ദ്രൻ്റെ അറിവോടെയാണ് കുഴൽപ്പണ ഇടപാട് നടന്നതെന്ന് നേരത്തെ വ്യക്തമായതാണെന്നും എം.വി. ഗോവിന്ദൻ പറഞ്ഞു. കരുവന്നൂർ കേസ് സി.പി.എമ്മിനെതിരെ തിരിച്ചുവിട്ടെന്നും എം.വി. ഗോവിന്ദൻ ചൂണ്ടിക്കാട്ടി. ശനിയാഴ്ച കൊച്ചി ഇ.ഡി ഓഫീസിലേക്ക് സി.പി.എം മാർച്ച് നടത്തും.

‘പൊലീസ് തെളിവുകളുടെ പശ്ചാത്തലത്തിലാണ് കേസ് ഇ.ഡി അന്വേഷണം ആവശ്യപ്പെട്ടത്. ബി.ജെ.പിക്കായി ചാർജ് ഷീറ്റ് മാറ്റിയെഴുതിയാണ് ഇ.ഡി കോടതിയിൽ എത്തിച്ചത്. കോടിക്കണക്കിന് രൂപ ബി.ജെ.പി ഓഫീസിൽ എത്തിച്ചെന്ന് മുൻ ഓഫീസ് സെക്രട്ടറിയാണ് മൊഴി നൽകിയത്. എന്നാൽ ഇ.ഡി തിരൂർ സതീഷിൽ നിന്ന് മൊഴി എടുത്തില്ല,’ എം.വി. ഗോവിന്ദൻ പറഞ്ഞു.

നിറത്തിന്റെ പേരിൽ ചീഫ് സെക്രട്ടറി ശാരദ മുരളീധരനെ അധിക്ഷേപിച്ചതിൽ എം.വി. ഗോവിന്ദൻ വിമർശിച്ചു. ഒരാളെ അളക്കുന്നത് കറുപ്പോ വെളുപ്പോ എന്ന് നോക്കിയാവരുത്. സൗന്ദര്യത്തിന്റെ അടയാളം വെളുപ്പാണെന്ന് ധരിച്ച് വച്ചിരിക്കുകയാണ് ചിലർ. ഫ്യൂഡൽ ജീർണതയുടെ മനസ്സിൻ്റെ ഭാഗമായിട്ടാണ് ചീഫ് സെക്രട്ടറിയെ അധിക്ഷേപിച്ചത്. കർശനമായ നിലപാട് ഇക്കാര്യത്തിൽ സ്വീകരിക്കണം. പരമ്പരാഗത ധാരണയുടെ ഭാഗമായിട്ടാണ് പ്രതിഷധത്തിന് കറുത്ത കൊടി വരുന്നത്. അത് മാറ്റുന്നതിനെക്കുറിച്ച് ആലോചിക്കാമെന്നും എം.വി. ഗോവിന്ദൻ പറഞ്ഞു.

Following ED's clean chit to BJP leaders in the Kodakara black money case, CPM has strongly criticized the ED, alleging it's working for the BJP and announcing a protest march to the ED office in Kochi. Congress leaders have also joined in, alleging a CPM-BJP deal. The CPM stands firm on its claim that the money was hawala, while the ED's findings contradict the police chargesheet.

#KodakaraCase #EDvsCPM #KeralaPolitics #BlackMoney #BJP #MVGovindan