Diplomatic Visit | പ്രധാനമന്ത്രി നരേന്ദ്ര മോദി യുക്രൈനിലേക്ക്; പോളണ്ടില്‍നിന്ന് ട്രെയിന്‍ മാര്‍ഗം യാത്ര
ന്യൂഡെല്‍ഹി: (KVARTHA) ഇന്ത്യയുടെ പ്രധാനമന്ത്രി നരേന്ദ്ര മോദി (PM Modi) ഈ മാസം 23-ന് യുക്രെയ്ൻ സന്ദർശിക്കുമെന്ന (Ukraine Visit) വലിയ വാർത്തയാണ് പുറത്ത് വന്നിരിക്കുന്നത്. 2022-ൽ റഷ്യ യുക്രെയ്നിൽ ആക്രമണം നടത്തിയതിന് ശേഷം ഇവിടം സന്ദർശിക്കുന്ന ആദ്യത്തെ ഇന്ത്യൻ പ്രധാനമന്ത്രിയായിരിക്കും മോദി. ആഴ്ചകളോളം നീണ്ടുനിന്ന ഊഹാപോഹങ്ങള്‍ക്ക് ശേഷമാണ് മോദിയുടെ യുക്രെയ്ന്‍ സന്ദര്‍ശനം വിദേശകാര്യ മന്ത്രാലയം ഔദ്യോഗികമായി സ്ഥിരീകരിച്ചത്.
യുക്രെയ്ൻ സന്ദർശനത്തിന് മുമ്പ് മോദി പോളണ്ടിലും എത്തും. ഇന്ത്യയും പോളണ്ടും തമ്മിലുള്ള നയതന്ത്ര ബന്ധത്തിന്റെ 70-ാം വാർഷികമാണ് ആഘോഷിക്കുന്നത്. പോളണ്ടിൽ നിന്ന് ട്രെയിൻ മാർഗമായിരിക്കും മോദി യുക്രെയ്നിന്റെ തലസ്ഥാനമായ കീവിലേക്ക് പോകുക. റഷ്യയുടെ ആക്രമണത്തിൽ റെയിൽവേയുടെ വൈദ്യുത ശൃംഖലകൾ തകർന്നതിനാൽ ഡീസൽ ലോക്കോമോട്ടീവായിരിക്കും ഉപയോഗിക്കുക.
സാമ്പത്തികം, വാണിജ്യം, കൃഷി, അടിസ്ഥാന സൗകര്യ വികസനം തുടങ്ങിയ വിഷയങ്ങളിലാണ് മോദിയും യുക്രെയ്ൻ പ്രസിഡന്റ് സെലെൻസ്‌കിയും ചർച്ച നടത്തുക. റഷ്യയുമായുള്ള യുദ്ധത്തിന് ഒരു പരിഹാരം കാണുന്നതിനുള്ള ശ്രമങ്ങളും നടക്കും. 30 വർഷത്തിനിടെ ഒരു ഇന്ത്യൻ പ്രധാനമന്ത്രി യുക്രെയ്ൻ സന്ദർശിക്കുന്നത് ആദ്യമായിട്ടാണ്.
മോദിയും സെലെൻസ്‌കിയും ജൂണിൽ നടന്ന ജി 7 ഉച്ചകോടിയിൽ കണ്ടുമുട്ടിയിരുന്നു. ഓപ്പറേഷൻ ഗംഗയുടെ ഭാഗമായി യുക്രെയ്നിൽ നിന്ന് 18,000-ത്തിലധികം ഇന്ത്യൻ വിദ്യാർത്ഥികളെ ഇന്ത്യ ഒഴിപ്പിച്ചിരുന്നു. മോദിയുടെ യുക്രെയ്ൻ സന്ദർശനം ഇന്ത്യയുടെയും യുക്രെയ്നിന്റെയും ബന്ധത്തിൽ ഒരു വഴിത്തിരിവായിരിക്കും. ഈ സന്ദർശനം രണ്ട് രാജ്യങ്ങൾ തമ്മിലുള്ള സഹകരണം ശക്തിപ്പെടുത്തുകയും യുക്രെയ്‌നിലെ പ്രതിസന്ധിക്ക് ഒരു പരിഹാരം കാണുന്നതിന് സഹായിക്കുകയും ചെയ്യുമെന്നാണ് പ്രതീക്ഷിക്കുന്നത്.
#NarendraModi, #UkraineVisit, #IndiaUkraineRelations, #Poland, #RussianInvasion, #Diplomacy
