തിരുവനന്തപുരം: (KVARTHA) സംസ്ഥാനത്ത് 13 ദിവസമായി രാപ്പകൽ സമരം നടത്തിവന്ന അങ്കണവാടി ജീവനക്കാർ താൽക്കാലികമായി സമരത്തിൽ നിന്ന് പിന്മാറി. ധനമന്ത്രി കെ എൻ ബാലഗോപാലുമായി നടത്തിയ ചർച്ചയെ തുടർന്നാണ് സമരസമിതിയുടെ ഈ തീരുമാനം. തങ്ങളുടെ ആവശ്യങ്ങൾ മൂന്നു മാസത്തിനകം വിശദമായി പരിശോധിച്ച് ഉചിതമായ നടപടി സ്വീകരിക്കാമെന്ന് മന്ത്രി ഉറപ്പ് നൽകിയതായി സമരക്കാർ അറിയിച്ചു. കൂടാതെ, ശമ്പള വർദ്ധനവ് പരിഗണിക്കാമെന്നും മന്ത്രി സൂചന നൽകിയിട്ടുണ്ട്. 

ഈ ഉറപ്പുകളുടെ അടിസ്ഥാനത്തിൽ മൂന്നു മാസത്തേക്ക് സമരം നിർത്തിവയ്ക്കുകയാണെന്നും, ഈ കാലയളവിനുള്ളിൽ അനുകൂല നടപടി ഉണ്ടായില്ലെങ്കിൽ ശക്തമായ പ്രക്ഷോഭം പുനരാരംഭിക്കുമെന്നും ജീവനക്കാർ മുന്നറിയിപ്പ് നൽകി. ഇന്ത്യൻ നാഷണൽ അങ്കണവാടി എംപ്ലോയീസ് ഫെഡറേഷന്റെ (INTUC) നേതൃത്വത്തിലായിരുന്നു സമരം. സർക്കാർ ജീവനക്കാരായി അംഗീകരിക്കുക, കുറഞ്ഞ വേതനം 21,000 രൂപയാക്കുക, വേതനം കൃത്യ സമയത്ത് ഒറ്റ ഗഡുവായി നൽകുക, ഗുണമേന്മയുള്ള ഭക്ഷ്യവസ്തുക്കൾ ഉറപ്പാക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സെക്രട്ടേറിയറ്റിന് മുന്നിൽ ഇവരുടെ സമരം. 

ധനമന്ത്രി സമരക്കാരുമായി ചർച്ച നടത്തുകയും, ചർച്ചയുടെ മിനുട്സ് ഇന്നലെ സമരസമിതിക്ക് കൈമാറുകയും ചെയ്തു. അങ്കണവാടി ജീവനക്കാരുടെ പ്രശ്നങ്ങൾ പഠിക്കാൻ വിദഗ്ധ സമിതിയെ നിയോഗിക്കുമെന്നും മന്ത്രി ഉറപ്പ് നൽകിയിട്ടുണ്ട്. അതേസമയം, സെക്രട്ടറിയേറ്റിന് മുന്നിൽ ആശാ വർക്കർമാർ നടത്തുന്ന സമരം 48-ാം ദിവസത്തിലേക്ക് കടന്നു. ഇവരുടെ നിരാഹാര സമരം ഒമ്പതാം ദിവസവും പിന്നിട്ടു. ആരോഗ്യനില വഷളായതിനെ തുടർന്ന് നിരാഹാരം അനുഷ്ഠിച്ചിരുന്ന ശൈലജയെ ആശുപത്രിയിലേക്ക് മാറ്റി. 

മാർച്ച് 20 രാവിലെ 11 മണിക്കാണ് ആശാ പ്രവർത്തകർ നിരാഹാര സമരം ആരംഭിച്ചത്. രാപ്പകൽ സമരം 50 ദിവസം തികയുന്ന തിങ്കളാഴ്ച പ്രതിഷേധം കടുപ്പിക്കാൻ മുടി മുറിക്കൽ സമരം നടത്താൻ ആശാ വർക്കർമാർ തീരുമാനിച്ചിട്ടുണ്ട്. സംസ്ഥാന വ്യാപകമായി ഈ പ്രതിഷേധം സംഘടിപ്പിക്കാനാണ് തീരുമാനം. നേരത്തെ സെക്രട്ടറിയേറ്റ് സമര പന്തലിൽ മാത്രമാണ് മുടി മുറിക്കൽ സമരം നടത്താൻ തീരുമാനിച്ചിരുന്നത്. എന്നാൽ ഇതിന് ഐക്യദാർഢ്യം പ്രഖ്യാപിച്ച് പ്രാദേശിക തലത്തിലും ആശാ പ്രവർത്തകർ മുടി മുറിച്ച് പ്രതിഷേധിക്കും.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Anganwadi workers have temporarily withdrawn their strike after Finance Minister's assurance. Meanwhile, Asha workers continue their protest and hunger strike.

#AnganwadiWorkers #AshaWorkers #KeralaProtests #FinanceMinister #Strike #GovernmentEmployees