മലപ്പുറം: (KVARTHA) നിലമ്പൂർ എംഎൽഎ പി വി അൻവർ തൃണമൂൽ കോൺഗ്രസിലേക്ക് ചേക്കേറിയതോടെ അദ്ദേഹത്തിന്റെ ഭാവിയെക്കുറിച്ചുള്ള ചോദ്യങ്ങൾക്ക് ഏറെക്കുറെ ഉത്തരമായിരിക്കുന്നു. ഇനി തൃണമൂൽ യുഡിഎഫിന്റെ ഭാഗമാകുമോയെന്ന് കണ്ടറിയണം. അത് വിദൂര സാധ്യതയാണെന്നും മൂന്നാം മുന്നണിയാണ് അൻവറിന്റെ ലക്ഷ്യമെന്നും വിലയിരുത്തുന്നവരുണ്ട്. കോൺഗ്രസ്, ഡിഐസി, എൽഡിഎഫ്, ഡിഎംകെ എന്നീ പാർടികളിലൂടെയുള്ള അൻവറിന്റെ രാഷ്ട്രീയ യാത്രയാണ് ഒടുവിൽ തൃണമൂൽ കോൺഗ്രസിൽ എത്തി നിൽക്കുന്നത്.

മുഖ്യമന്ത്രി പിണറായി വിജയനും സർകാരിനുമെതിരെ ശക്തമായ നിലപാടെടുത്ത അൻവറിൻ്റെ ഈ പുതിയ നീക്കം കേരള രാഷ്ട്രീയത്തിൽ ശ്രദ്ധേയമായ ചലനങ്ങൾക്ക് വഴിയൊരുക്കുമോയെന്നാണ് ഉറ്റുനോക്കുന്നത്. അതീവ രഹസ്യമായിട്ടായിരുന്നു അൻവറിന്റെ നീക്കങ്ങൾ. തൃണമൂൽ എം പി അഭിഷേക് ബാനർജിയാണ് അൻവറിനെ പാർടിയിലേക്ക് സ്വീകരിച്ചത്. തൃണമൂലിന്റെ ഔദ്യോഗിക സാമൂഹ്യ മാധ്യമ പേജുകളിൽ ഈ ചിത്രങ്ങൾ പങ്കുവെച്ചതോടെ അൻവറിൻ്റെ തൃണമൂൽ പ്രവേശനം കൂടുതൽ വ്യക്തമായി.

എൽഡിഎഫ് സ്വതന്ത്ര സ്ഥാനാർഥിയായി വിജയിച്ച പി വി. അൻവർ, മുഖ്യമന്ത്രി പിണറായി വിജയനും പൊളിറ്റികൽ സെക്രടറി പി ശശിക്കുമെതിരെ ആഞ്ഞടിച്ചതിന് പിന്നാലെയാണ് മുന്നണിയുമായി അകന്നത്. വലിയ ചർച്ചകൾക്കും വിവാദങ്ങൾക്കും വഴി തെളിയിച്ച പല ആരോപണങ്ങളും അൻവർ ഉന്നയിച്ചിരുന്നു.  എഡിജിപിയായിരുന്ന എം ആർ അജിത് കുമാറിനെതിരെയുള്ള ആരോപണങ്ങളിൽ വ്യക്തമായ മറുപടി ലഭിക്കാത്തതിനെ തുടർന്ന് അൻവർ പരസ്യമായി പ്രതികരിക്കുകയും മുന്നണിക്ക് പുറത്തേക്ക് വരികയും ചെയ്തു. ഈ സംഭവവികാസങ്ങളാണ് അൻവറിനെ പുതിയൊരു രാഷ്ട്രീയ പാതയിലേക്ക് നയിച്ചത്.

തൃണമൂൽ കോൺഗ്രസിലേക്കുള്ള അൻവറിൻ്റെ യാത്ര പൂർണമായും രഹസ്യ സ്വഭാവം കാത്തുസൂക്ഷിച്ചുകൊണ്ടുള്ള ചർച്ചകളിലൂടെയാണ് മുന്നോട്ട് പോയത്. സുഷ്മിത ദേവ് എംപിയുടെ നേതൃത്വത്തിൽ നടന്ന ചർച്ചകളിൽ കേരളത്തിലെ മറ്റ് നാല് എംഎൽഎമാരെയും തൃണമൂലിലേക്ക് എത്തിക്കാനുള്ള ശ്രമങ്ങൾ അൻവർ നടത്തിയിരുന്നുവെന്ന് റിപോർടുകളുണ്ട്. 

കേരള രാഷ്ട്രീയത്തിൽ തങ്ങളുടെ സ്വാധീനം വർധിപ്പിക്കാനുള്ള തൃണമൂലിന്റെ തന്ത്രപരമായ നീക്കമായിട്ടാണ് ഇതിനെ രാഷ്ട്രീയ നിരീക്ഷകർ വിലയിരുത്തുന്നത്. വർഷങ്ങളോളം വമ്പൻ ഭൂരിപക്ഷത്തിൽ പശ്ചിമ ബംഗാളിൽ ഭരണം നടത്തിയ സിപിഎമ്മിന്റെ അടിവേരറുത്ത പാർടിയാണ്  തൃണമൂൽ കോൺഗ്രസ്. അൻവറിൻ്റെ സാന്നിധ്യം കേരളത്തിൽ തങ്ങൾക്ക് വലിയ മുന്നേറ്റം നൽകുമെന്നും തൃണമൂൽ കണക്കുകൂട്ടുന്നു.

അൻവറിൻ്റെ നേതൃത്വത്തിലൂടെ സംസ്ഥാന രാഷ്ട്രീയത്തിൽ ശക്തമായ ഒരു സാന്നിധ്യമാകാൻ സാധിക്കുമെന്നും അവർ വിശ്വസിക്കുന്നു. നിയമ പ്രശ്നങ്ങൾ കാരണം അൻവർ നിലവിൽ തൃണമൂൽ കോൺഗ്രസിൽ ഔദ്യോഗിക അംഗത്വം എടുത്തിട്ടില്ല. സംസ്ഥാന കോ-ഓർഡിനേറ്റർ എന്ന നിലയിലാണ് പ്രവർത്തിക്കുക. 2026 ലെ നിയമസഭാ തിരഞ്ഞെടുപ്പിന് മുന്നോടിയായി സംസ്ഥാന അധ്യക്ഷ സ്ഥാനത്തേക്ക് എത്തിയേക്കും. അൻവറിൻ്റെ ഈ നീക്കം കേരള രാഷ്ട്രീയത്തിൽ എന്ത് മാറ്റങ്ങൾ കൊണ്ടുവരുമെന്ന് കാത്തിരുന്നു കാണേണ്ടിയിരിക്കുന്നു.

 #KeralaPolitics #TrinamoolCongress #PVAnwar #PoliticalShift #KeralaElections #StatePolitics