അര്‍ധ സെഞ്ച്വറി എടുത്തതിന് പിന്നാലെ ഗാലറിയില്‍ നിന്നിരുന്ന അനുഷ്‌കയുടേയും മകളുടേയും ചിത്രങ്ങള്‍ വ്യാപകമായി പ്രചരിച്ചു; പിന്നാലെ ദയവായി മകളുടെ ചിത്രം എടുക്കരുതെന്നും പകര്‍ത്തരുതെന്നും അഭ്യര്‍ഥിച്ച് വിരാട് കോലി വീണ്ടും രംഗത്ത്

കേപ് ടൗണ്‍: (www.kvartha.com 24.01.2022) ദക്ഷിണാഫ്രികയ്ക്കെതിരായ മൂന്നാം ഏകദിനത്തിനിടയില്‍ അര്‍ധ സെഞ്ച്വറി എടുത്തതിന് പിന്നാലെ ഗാലറിയില്‍ നിന്നിരുന്ന അനുഷ്‌കയുടേയും മകളുടേയും ചിത്രങ്ങള്‍ വ്യാപകമായി പ്രചരിച്ചതിന് പിന്നാലെ ദയവായി മകളുടെ ചിത്രം എടുക്കരുതെന്നും പകര്‍ത്തരുതെന്നും അഭ്യര്‍ഥിച്ച് വിരാട് കോലി വീണ്ടും രംഗത്ത്. അര്‍ധസെഞ്ച്വറി പൂര്‍ത്തിയാക്കിയ ഉടന്‍ കോലി 'തൊട്ടില്‍ സെലബ്രേഷ'നിലൂടെ നേട്ടം കുഞ്ഞിന് സമര്‍പിച്ചിരുന്നു.

ഗാലറിയിലേക്ക് നോക്കിയായിരുന്നു കോലിയുടെ ആഘോഷം. ഇതിനു പിന്നാലെയാണ് ഗാലറിയില്‍ നില്‍ക്കുന്ന അനുഷ്‌കയിലേക്കും വാമികയിലേക്കും കാമറക്കണ്ണുകള്‍ നീണ്ടത്. തുടര്‍ന്ന് കോലിയുടെ മകളുടെ ചിത്രം സമൂഹമാധ്യമങ്ങളില്‍ വ്യാപകമായി പ്രചരിക്കുകയും ചെയ്തു.

എന്നാല്‍, തങ്ങളുടെ അറിവോ സമ്മതമോ കൂടാതെ തികച്ചും അപ്രതീക്ഷിതമായാണ് ഈ ചിത്രം പകര്‍ത്തിയതെന്ന് കോലി ഇന്‍സ്റ്റഗ്രാം സ്റ്റോറിയിലൂടെ വ്യക്തമാക്കി. കുഞ്ഞിന്റെ ചിത്രം എടുക്കുകയും പ്രചരിപ്പിക്കുകയും ചെയ്യരുതെന്ന പഴയ നിലപാടു തന്നെയാണ് ഇപ്പോഴുമുള്ളതെന്നും കോലി അറിയിച്ചു.

കോലി ഇന്‍സ്റ്റഗ്രാമില്‍ കുറിച്ചത് ഇങ്ങനെ:

'പ്രിയരേ, ഇന്നലെ സ്റ്റേഡിയത്തില്‍വച്ച് ഞങ്ങളുടെ മകളുടെ ചിത്രം പകര്‍ത്തുകയും അതിനുശേഷം വ്യാപകമായി പ്രചരിപ്പിക്കുകയും ചെയ്യുന്നതായി മനസ്സിലാക്കുന്നു. ഞങ്ങള്‍ അറിയാതെ തികച്ചും അപ്രതീക്ഷിതമായാണ് ഈ ചിത്രം പകര്‍ത്തിയത്. കാമറ ഞങ്ങള്‍ക്കു നേരെ തിരിഞ്ഞിരിക്കുന്ന വിവരം അറിഞ്ഞിരുന്നില്ല'.

'മകളുടെ ചിത്രം പുറത്തുവിടുന്നതുമായി ബന്ധപ്പെട്ട് ഞങ്ങളുടെ നിലപാടില്‍ ഇപ്പോഴും മാറ്റമില്ല. ഞങ്ങള്‍ മുന്‍പ് വിശദീകരിച്ചിട്ടുള്ള കാരണങ്ങളാല്‍ വാമികയുടെ ചിത്രം പകര്‍ത്തുന്നതും പ്രസിദ്ധീകരിക്കുന്നതും നിര്‍ത്തണമെന്ന് അഭ്യര്‍ഥിക്കുന്നു. നന്ദി' കോലി എഴുതി.

മകളുടെ ചിത്രം പരസ്യപ്പെടുത്തുന്നതിനോടുള്ള എതിര്‍പ്പ് അറിയിച്ച് കോലിയും അനുഷ്‌കയും മുന്‍പ് സംയുക്ത പ്രസ്താവന ഇറക്കിയിരുന്നു. സ്വകാര്യത മാനിക്കണമെന്ന് അഭ്യര്‍ഥിച്ചാണ് ഇരുവരും ഈ ആവശ്യം ഉന്നയിച്ചത്.