ചെന്നൈ: (KVARTHA) ഐപിഎല്ലിൽ തുടരുമെന്ന സൂചന നൽകി ചെന്നൈ സൂപ്പർ കിങ്സിന്റെ സൂപ്പർ താരം മഹേന്ദ്ര സിങ് ധോണി. 2025 സീസൺ മാത്രമല്ല, അതിനുശേഷവും കളിക്കാൻ ആഗ്രഹിക്കുന്നുവെന്നും ആസ്വദിക്കാൻ കഴിയാവുന്നത്ര ക്രിക്കറ്റ് കളിക്കണം എന്നുമാണ് താരം പ്രതികരിച്ചത്. ഐപിഎല്ലിലെ അൺകാപ്ഡ് നിയമം തിരികെ കൊണ്ടുവന്നത് ധോണിയുടെ തുടർച്ചയ്ക്ക് സഹായകമാകും. ഈ നിയമപ്രകാരം, അന്തർദേശീയ ക്രിക്കറ്റിൽ നിന്ന് വിരമിച്ച താരങ്ങളെ ഫ്രാഞ്ചൈസികൾക്ക് കുറഞ്ഞ തുകയിൽ നിലനിർത്താം. അന്തർദേശീയ ക്രിക്കറ്റിൽ നിന്ന് അഞ്ചു വർഷത്തോളം വിട്ടു നിൽക്കുന്ന ഇന്ത്യൻ താരങ്ങളെ ഐപിഎൽ ടീമുകൾക്ക് നിലനിർത്താൻ അനുമതി നൽകുന്ന നിയമമാണ് ഇത്. ഈ നിയമം പ്രധാനമായും ധോണിയെ ഉദ്ദേശിച്ചുള്ളതാണെന്ന വിമർശനം ഉയർന്നിരുന്നു. ഈ നിയമപ്രകാരം, ചെന്നൈ സൂപ്പർ കിങ്സ് ധോണിയെ നാല് കോടി രൂപയ്ക്ക് ടീമിൽ നിലനിർത്താൻ സാധിക്കും. 2019-ലെ ഏകദിന ലോകകപ്പിൽ ന്യൂസീലൻഡിനെതിരായ മത്സരമായിരുന്നു ധോണി അവസാനമായി ഇന്ത്യക്കായി കളിച്ചത്.

'ഇനിയും കുറച്ചു കാലം ക്രിക്കറ്റ് ആസ്വദിക്കണം എന്നാണ് എന്റെ ആഗ്രഹം. ഒമ്പത് മാസം ഫിറ്റായിരിക്കാൻ ശ്രമിക്കുന്നതുകൊണ്ട് രണ്ടര മാസത്തെ ഐപിഎൽ എനിക്ക് ഒരു പ്രശ്നമല്ല, ചെറുപ്പത്തിൽ നാല് മണിക്കാണ് ക്രിക്കറ്റ് കളിക്കാൻ പോയിരുന്നത്. പക്ഷേ പ്രൊഫഷണൽ ക്രിക്കറ്റ് അങ്ങനെ അല്ല. ടീമിനോട് ഉത്തരവാദിത്തം ഉണ്ട്' ധോണി പറഞ്ഞു. ടീമുകൾ താരങ്ങളെ നിലനിർത്തുന്നതിനുള്ള അവസാന തീയതി അടുത്തുവരുന്നതിനിടയിലാണ് ധോണി തന്റെ തീരുമാനം അറിയിച്ചത്.

#Dhoni #IPL2025 #CSK #CricketNews #SportsUpdate