കണ്ണില്ലാത്ത ക്രൂരത: ഏഴ് വയസുക്കാരനെ ദേഹമാകെ തേനീച്ച പൊതിഞ്ഞ് തടി കഷണത്തിൽ കെട്ടിയിട്ട നിലയിൽ: സംഭവത്തിൽ അച്ഛൻ പൊലീസ് കസ്റ്റഡിയിൽ

കെയ്‌റോ: (www.kvartha.com 03.06.2021) മാതാപിതാക്കൾ മക്കളെ അതിരുവിട്ട് ശിക്ഷിക്കുന്ന വിഡിയോസും ചിത്രങ്ങളും സമൂഹ മാധ്യമങ്ങളിൽ പ്രചരിക്കാറുണ്ട്. ശിക്ഷ എന്ന പരിധി വിട്ട് പീഡനം എന്ന നിലയിലേയ്ക്ക് ചെന്നെത്താറുമുണ്ട്. മദ്യത്തിന്റെയും മയക്ക് മരുന്നിന്റെയും സ്വാധീനത്തിലോ, അതുമല്ലെങ്കിൽ മാനസിക ബലഹീനതകളുടെ പുറത്തോ ഒക്കെ കാട്ടിക്കൂട്ടുന്ന ക്രൂരതകൾ പലപ്പോഴും അതിരുകടക്കുകയാണ്. അങ്ങനെയുള്ള ഒരു വാർത്തയാണ് ഇപ്പോൾ സമൂഹ മാധ്യമങ്ങളിൽ ചർചാവിഷയം.

മകൻ മോഷ്ടിച്ചെന്ന് അയൽക്കാരന്റെ ആരോപണത്തെ തുടർന്ന് സ്‌കൂൾ വിദ്യാർഥിയായ മകനെ തടിക്കഷണത്തിൽ കെട്ടിയിട്ട് തേനീച്ചകളെ ആകർഷിക്കാനായി മുഖത്ത് തേൻ ഒഴിച്ചു കൊടുത്തുവെന്നാണ് പുറത്തുവരുന്ന റിപോർടുകൾ. ഏഴ് വയസ് മാത്രമുള്ള ആൺകുട്ടിയുടെ മുഖത്ത് തേനീച്ചക്കൂട്ടം പൊതിയുന്ന ചിത്രം സമൂഹമാധ്യമങ്ങളിൽ പ്രചരിക്കുന്നുമുണ്ട്. കൈകൾ പുറകിൽ കെട്ടി, അനങ്ങാൻ പോലും കഴിയാത്ത വിധം തേനീച്ചകളുടെ ആക്രമണം ഏൽക്കേണ്ടി വന്നിരിക്കുകയാണ് ഏഴ് വയസുകാരന്.

എന്നാൽ, ദേഷ്യമടങ്ങാത്ത അച്ഛൻ മകനെ വീടിന്റെ മേൽക്കൂരയിൽ കൊണ്ട് പോയി ഇരുത്തിയെന്നും അവിടെ വച്ച് ശരീരത്തിലുടനീളം കൊതുകുകളും തേനീച്ചകളും അവനെ കടിച്ചുവെന്നും അമ്മ പറഞ്ഞുവെന്നാണ് റിപോർട്. സംഭവത്തെ തുടർന്ന് 34 -കാരനായ പിതാവിനെ പൊലീസ് അറസ്റ്റ് ചെയ്തു. സംഭവസമയത്ത് അമ്മ എടുത്ത മകന്റെ ചിത്രം ഇപ്പോൾ പിതാവിനെതിരെയുള്ള തെളിവായി പൊലീസ് എടുത്തിരിക്കുകയാണ്. സംഭവത്തെ കുറിച്ച് അന്വേഷണം ആരംഭിക്കുകയും ചെയ്തു.