അധ്യാപകന്റെ നിര്‍ദേശപ്രകാരം കെട്ടിടത്തിനുമുകളില്‍ നിന്നും ചാടി വിദ്യാര്‍ത്ഥി ആത്മഹത്യ ചെയ്തു

ബെയ്ജിംഗ്: ക്ലാസില്‍ സംസാരിച്ച കുട്ടിയോട് ക്ഷമാപണം നല്‍കിക്കൊണ്ട് കത്ത് നല്‍കാന്‍ ആവശ്യപ്പെട്ട അധ്യാപകന്‍ കുട്ടി കത്ത് നല്‍കാത്തതിനാല്‍ കെട്ടിടത്തില്‍ നിന്നും ചാടാന്‍ നിര്‍ദേശിച്ചു.

 തുടര്‍ന്ന് അധ്യാപകന്റെ നിര്‍ദേശം അനുസരിച്ച പത്തു വയസുകാരന്‍ 30 നില കെട്ടിടത്തിന്റെ മുകളില്‍ നിന്നും ചാടി ആത്മഹത്യ ചെയ്തു. ചൈനയിലെ ജിന്‍ജിയാങ് ജില്ലയിലെ ചെങ്ഡുവിലാണ് സംഭവം.

അഞ്ചാം ക്ലാസില്‍ പഠിക്കുന്ന കുട്ടിയാണ് ആത്മഹത്യയ്ക്ക്  മുതിര്‍ന്നത്. കുട്ടി കെട്ടിടത്തിന്റെ മുകളില്‍ നിന്നും ചാടി ആത്മഹത്യ ചെയ്ത സംഭവത്തില്‍  രോഷാകുലരായ ബന്ധുകള്‍ സ്‌കൂളിന്റെ പുറത്ത് അധ്യാപകന്‍ കാരണമാണ് കുട്ടി കെട്ടിടത്തില്‍ നിന്നും ചാടിയതെന്ന്  എഴുതിയ ബാനര്‍ തൂക്കിയിട്ടുണ്ട്.

സംഭവത്തില്‍ ബന്ധുക്കളുടെ പരാതിയില്‍ പോലീസ് അധ്യാപകനെതിരെ അന്വേഷണം ആരംഭിച്ചു. ചൈനയിലെ സ്‌കൂളുകളില്‍ കുട്ടികളെ കടുത്ത അച്ചടക്കം അടിച്ചേല്‍പ്പിക്കുകയാണെന്ന ആക്ഷേപം നിലനില്‍ക്കുന്ന സാഹചര്യത്തിലാണ് അധ്യാപകന്‍ കാരണം ഒരു കുട്ടി ആത്മഹത്യയ്ക്ക്
മുതിര്‍ന്നത്. ഇത് ജനങ്ങളെ അധ്യാപകര്‍ക്കെതിരെ തിരിക്കാനിടയാക്കിയിട്ടുണ്ട്.



Also Read:
കോട്ടിക്കുളം റെയില്‍വേ സ്‌റ്റേഷന് വികസനത്തിന്റെ ചൂളംവിളി