Discovery | ചന്ദ്രൻ ഭൂമിയെ വിട്ടുപോകുന്നു! ഒരു ദിവസത്തിന്റെ ദൈർഘ്യം 25 മണിക്കൂർ ആവും; ഞെട്ടിക്കുന്ന കണ്ടെത്തലുമായി ശാസ്ത്രജ്ഞർ 

ന്യൂഡൽഹി: (KVARTHA) കവികൾക്കും കലാകാരന്മാർക്കും പ്രചോദനം നൽകിയ, കുട്ടികളെ ആകർഷിച്ച ഭൂമിയുടെ സ്വാഭാവിക ഉപഗ്രഹമായ ചന്ദ്രൻ നമ്മെ വിട്ടുപോകുകയാണെന്ന് പഠനങ്ങൾ. സയൻസ് ഫിക്ഷൻ കഥയെ ഓർമ്മിപ്പിക്കുന്ന ശാസ്ത്രജ്ഞരുടെ കണ്ടെത്തൽ ശ്രദ്ധാപൂർവ്വമായ നിരീക്ഷണങ്ങളിലൂടെയും പരിശോധനകളിലൂടെയുമാണ്. വിസ്കോൺസിൻ-മാഡിസൺ സർവകലാശാലയിലെ ഗവേഷകർ ഒമ്പത് കോടി വർഷം പഴക്കമുള്ള പാറകൾ പരിശോധിച്ച് ചന്ദ്രൻ ഭൂമിയെ വിട്ടുപോകുന്നതിന്റെ പ്രത്യാഘാതങ്ങളെക്കുറിച്ച് പഠിച്ചു.

പ്രതിവർഷം ഏകദേശം 3.8 സെൻ്റീമീറ്റർ എന്ന തോതിൽ ചന്ദ്രൻ ഭൂമിയിൽ നിന്ന് വിട്ടുപോകുന്നുവെന്ന് പഠനം എടുത്തുകാണിക്കുന്നു. ഓരോ വർഷവും ഏകദേശം 3.8 സെന്റിമീറ്റർ വീതം ചന്ദ്രൻ ഭൂമിയെ വിട്ടുപോകുന്നത് ഭൂമിയിലെ ദിവസങ്ങളുടെ ദൈർഘ്യത്തെ ബാധിക്കുമെന്നാണ് അഭിപ്രായം. 20 കോടി വർഷങ്ങൾക്കുള്ളിൽ ഒരു ഭൂമിദിവസം 25 മണിക്കൂർ നീണ്ടുനിൽക്കും എന്ന് പഠനങ്ങൾ പറയുന്നു. 1.4 ബില്യൺ വർഷങ്ങൾക്ക് മുമ്പ് ഭൂമിയിലെ ഒരു ദിവസം 18 മണിക്കൂറിൽ കൂടുതലായിരുന്നുവെന്നാണ് ഗവേഷകർ വ്യക്തമാക്കുന്നത്.

കാരണമെന്ത്?

ഭൂമിയും ചന്ദ്രനും തമ്മിലുള്ള ഗുരുത്വാകർഷണ ബലത്തിന്റെ ഇടപെടലാണ് പ്രധാനമായും ഈ പ്രതിഭാസത്തിന് കാരണം. പ്രത്യേകിച്ചും, ഈ രണ്ട് ആകാശഗോളങ്ങൾ പരസ്പരം ചെലുത്തുന്ന ജലപ്രവാഹ ബലം (Tidal Forces). ഈ ബലം ഭൂമിയിലെ സമുദ്രങ്ങളിൽ വേലിയേറ്റവും മറ്റും ഉണ്ടാക്കുന്നത് നാം കാണാറുണ്ട്. എന്നാൽ ഈ ബലം ഭൂമിയുടെ ഭ്രമണത്തെയും ബാധിക്കുന്നുവെന്നും ഇത് ചന്ദ്രനെ നമ്മളിൽ നിന്ന് അകറ്റുന്നതിന് കാരണമാകുന്നുവെന്നുമാണ് ഗവേഷകരുടെ കണ്ടെത്തൽ.

ചന്ദ്രന്റെ അകൽച്ച പുതിയ കണ്ടെത്തലല്ലെങ്കിലും ഈ പ്രതിഭാസത്തിന്റെ ചരിത്രവും ഭൗമശാസ്ത്രപരമായ പ്രത്യാഘാതങ്ങളും കൂടുതൽ മനസിലാക്കാൻ ഈ പഠനം സഹായിക്കും. പുരാതന പാറകളും മണൽപാളികളും പഠനം നടത്തി ഭൂമിയും ചന്ദ്രനും കോടിക്കണക്കിന് വർഷങ്ങൾക്കിടയിലെ ചരിത്രം ഗവേഷകർ വിലയിരുത്തുന്നു. ഭൂമിയുടെ ഭ്രമണ വേഗതയും ഭൂഖണ്ഡ സഞ്ചാരവും പോലുള്ള ഘടകങ്ങൾ കാരണം ചന്ദ്രന്റെ അകൽച്ച നിരക്ക് ചരിത്രത്തിൽ വ്യത്യസ്തപ്പെട്ടിട്ടുണ്ട് എന്നും പഠനം സൂചിപ്പിക്കുന്നു.