ന്യൂഡല്‍ഹി: (KVARTHA) ഹിജ്റ വര്‍ഷത്തിലെ റജബ് മാസത്തിന്റെ ആരംഭത്തോടെ ഇസ്ലാം മത വിശ്വാസികള്‍ പുണ്യ റമദാനിനായുള്ള കാത്തിരിപ്പിലാണ്. റജബിലും ശഅബാനിലും റമദാനിലും  അനുഗ്രഹങ്ങള്‍ വര്‍ഷിക്കണമേ എന്ന പ്രാര്‍ത്ഥനയോടെ വിശ്വാസികള്‍ ഈ പുണ്യ മാസങ്ങളെ വരവേല്‍ക്കുന്നു. ഈ മൂന്ന് മാസങ്ങളും ഇസ്ലാമിക വിശ്വാസത്തില്‍ അതീവ പ്രാധാന്യമര്‍ഹിക്കുന്നവയാണ്. ഈ സമയങ്ങളില്‍ വിശ്വാസികള്‍ കൂടുതല്‍ പ്രാര്‍ത്ഥനകളിലും പുണ്യ പ്രവൃത്തികളിലും മുഴുകുന്നു.

ഈ സമയത്ത്, റമദാനുമായി ബന്ധപ്പെട്ട് ഒരു ഗ്രാഫിക്‌സ് സാമൂഹ്യ മാധ്യമങ്ങളില്‍ വ്യാപകമായി പ്രചരിക്കുകയാണ്. 2024 മുതല്‍ 2055 വരെയുള്ള 33 വര്‍ഷങ്ങളില്‍ റമദാന്‍ മാസത്തിന്റെ ആരംഭ തീയതികള്‍ ഇതില്‍ രേഖപ്പെടുത്തിയിരിക്കുന്നു. ഈ ഗ്രാഫിക്‌സ് അനുസരിച്ച്, 2024-ല്‍ റമദാന്‍ മാര്‍ച്ച് 12-ന് ആരംഭിക്കും. കൂടാതെ, 2030-ല്‍ റമദാന്‍ രണ്ടുതവണ വരുന്നു എന്നൊരു പ്രത്യേകതയുമുണ്ട്; ഒന്ന് ജനുവരിയിലും മറ്റൊന്ന് ഡിസംബറിലും.

ഗ്രാഫിക്‌സില്‍ ശ്രദ്ധേയമായ മറ്റൊരു കാര്യം, ഓരോ വര്‍ഷവും റമദാന്‍ മാസത്തിന്റെ ആരംഭ തീയതി മാറിക്കൊണ്ടിരിക്കും എന്നതാണ്. ഇത് ഇസ്ലാമിക കലണ്ടര്‍ ചാന്ദ്രനെ അടിസ്ഥാനമാക്കിയുള്ളതുകൊണ്ടാണ്. കൂടാതെ, വടക്കേ അര്‍ദ്ധഗോളത്തില്‍ ഏറ്റവും കൂടുതല്‍ വ്രതാനുഷ്ഠാന സമയം അനുഭവപ്പെടുന്ന വര്‍ഷവും, തെക്കേ അര്‍ദ്ധഗോളത്തില്‍ ഏറ്റവും കുറഞ്ഞ വ്രതാനുഷ്ഠാന സമയം അനുഭവപ്പെടുന്ന വര്‍ഷവും  അടയാളപ്പെടുത്തിയിട്ടുണ്ട്. 

അതുപോലെ, തെക്കേ അര്‍ദ്ധഗോളത്തില്‍ ഏറ്റവും കൂടുതല്‍ വ്രതാനുഷ്ഠാന സമയം അനുഭവപ്പെടുന്ന വര്‍ഷവും വടക്കേ അര്‍ദ്ധഗോളത്തില്‍ ഏറ്റവും കുറഞ്ഞ സമയം അനുഭവപ്പെടുന്ന വര്‍ഷവും രേഖപ്പെടുത്തിയിരിക്കുന്നു. ഇസ്ലാമിക് ഫൈന്‍ഡര്‍ ഡോട്ട് ഓര്‍ഗില്‍ നിന്ന് ലഭിച്ച വിവരങ്ങളുടെ അടിസ്ഥാനത്തില്‍ അല്‍ ജസീറ ആണ് 2024ല്‍ ഈ ഗ്രാഫിക്‌സ് തയ്യാറാക്കിയിരിക്കുന്നത്. അതാണിപ്പോള്‍ വൈറലായിരിക്കുന്നത്. മാസപ്പിറവി കാണുന്നതിന് അനുസരിച്ച് തീയതികളില്‍ മാറ്റങ്ങള്‍ വരാമെന്നും ഗ്രാഫിക്‌സില്‍ പറയുന്നു.

#Ramadan #IslamicCalendar #lunarcalendar #RamadanDates #Islam #religion #viral #fasting